Kurangarira ibintu bitandukanye kw’abashakanye bageze mu buriri bigira ingaruka zikomeye ku mibanire yabo dore ko bimwe mu bibarangaza biba bitari mu nyungu z’umuryango.
Kubera iterambere bamwe mu bashakanye iyo bageze mu buriri, babanza kurangarira ku mbuga zirimo Facebook, Whatsapp, Skype, Viber n’izindi zitandukanye dore ko ngo hari n’abagera ku buriri bakaharebera filime, umwanya bagombaga guha uwo baryamanye ugashirira muri ibyo birangaza.
Ibibarangaza bituma batabona umwanya wo kuganira
Kubwimana ni umugabo ufite umugore, ariko ngo aramushaka akamubura. Yagize ati “ Duhaguruka mu ruganiriro nzi ko tugiye kuryama ariko iyo tugeze mu buriri ahita afata telefoni ye akajya kuri Whatsapp, n’iyo ngize icyo mubaza ansubiza ubona ko adahari.”
Niwemugeni yemera ko arangarira ku mbuga nkoranyambaga iyo ageze mu buriri. Ati “ Iyo ngeze mu buriri mbanza kureba ko nta butumwa nohererejwe n’inshuti zanjye, hari igihe nshiduka umugabo yasinziriye .”
Nyiramana we atangaza ko umugabo we hari igihe ahugira kuri telefone kugeza ubwo igitotsi kimutwara agifashe telefoni mu ntoki. Ati “ Aba arimo kureba amafilime, ku buryo hari n’igihe nkanguka ngasanga aracyayareba, rimwe na rimwe nijye umwaka telefono yasinziriye.”
Bamwe mu bagabo baganiriye na IGIHE bakomeza bavuga ko babangamirwa cyane n’ibi birangaza abo bashakanye dore ko bituma batabona umwanya wo kuganira ndetse no guhuza urugwiro bityo bagahitamo kugorobereza mu gasozi.
Icyo abashakanye bakwiye kwitondera ni ibirangaza buri wese ku giti cye, kuko bituma mugenzi we yigunga ndetse ibitekerezo bye bikaba byajya kure. Ikindi ,nyuma yo kuva mu ruganiriro bagiye mu cyumba bararamo, ibirangaza buri wese ku giti biba bikwiye gusigara mu ruganiriro kuko bibabuza guhuza urugwiro uko bikwiye.
TANGA IGITEKEREZO