00:00:00 IGIHE NETWORK KN KINYARWANDA EN ENGLISH FR FRANCAIS

Abize amashuri abanza gusa ni bo banywa itabi cyane mu Rwanda: Ubushakashatsi

Yanditswe na Cyprien Niyomwungeri
Kuya 22 March 2022 saa 12:55
Yasuwe :

Ubushakashatsi bwa Gatandatu ku Bwiyongere n’Ubuzima bw’Abaturage, DHS, bw’umwaka wa 2019-20, bugaragaza ko mu Rwanda abize amashuri abanza gusa ari bo benshi banywa itabi, mu gihe abagore batageze kuri 1% ari bo barinywa.

Iyi mibare yerekana ko abagore mu Rwanda banywa itabi ry’isegereti cyangwa ubundi bwoko ari bake kuko bari munsi ya 1%. Ni mu gihe abagabo bangana na 7%, banywa itabi iryari ryo ryose, hanyuma 5% bakarinywa buri munsi.

Mu bagabo banywa isigara buri munsi, abagera kuri 67% banywa munsi y’isegereti eshanu buri munsi, mu gihe 22% banywa hagati y’isegereti 5-9, naho 10% bakanywa 10 kuzamura buri munsi.

Kubona abagore banywa itabi mu Rwanda si ikintu gisanzwe kuva 2014-2015, umugore 1% cyangwa munsi yaho ni we wanyoye itabi. Mu gihe abagabo banyoye itabi iryo ari ryo ryose bagabanutse bakava kuri 12% mu 2014-2015 bakagera kuri 7% mu 2019-2020.

Ijanisha ry’abanywa itabi mu Majyaruguru n’Uburengerazuba ni 4% naho mu Majyepfo ni 10%. Ijanisha ry’abagabo banywa isegereti na ryo ryaramanutse bigendanye n’amashuri abantu bafite. Abatize ni 21% naho abafite amashuri arenze ayisumbuye ni 2%. Abagabo bakennye banywa itabi ku kigero cya 15% mu gihe abakize barinywa kuri 4%.

Abagore bo mu Mujyi wa Kigali bari hagati y’imyaka 15-49 abagera ku 2.166 banywa itabi, mu Majyepfo ni 3.065, Uburengerazuba ni 3.174, Amajyaruguru ni 2.226 barimo 0.5% banywa isegereti gusa, Uburasirazuba ni 4.003 barimo 0.4% banywa isegereti gusa.

Abagabo banywa itabi mu Mujyi wa Kigali ni 879, barimo 7.5% banywa isegereti gusa, Amajyepfo ni 1239 barimo 9.6% banywa isegereti Uburengerazuba ni 1268 barimo 4.4% banywa isegereti, Amajyaruguru ni 886, Uburasirazuba ni 1574.

Abagabo bize amashuri abanza gusa ni bo banywa itabi cyane mu Rwanda, aho bangana na 3569, bakurikirwa n’abize amashuri yisumbuye bangana na 1562 mu gihe abize ayarenze ayisumbuye ari 295 gusa. Abagabo 5846 bari hagati y’imyaka 15-49 nibo banywa itabi mu Rwanda, abafite hagati ya 50-59 ni 667.

Mu bagore banywa itabi, abatize ni 1377, abize amashuri abanza ni 8529, abize ayisumbuye ni 4086, naho abize arenze ayisumbuye ni 642.

Ikigo cy’Igihugu gishinzwe Ubuzima, RBC, gikangurira Abanyarwanda kwirinda kunywera itabi mu ruhame no hafi y’abana by’umwihariko kuko bigira ingaruka zikomeye ku buzima bw’abana.

Abana bahumeka umwotsi w’itabi ry’amasegereti baba bafite ibyago byo kugira ibibazo by’ubuhumekero, asima cyangwa bagapfa bakiri bato.

Ni mu gihe abagore banywa itabi batwite byagaragaye ko na bo baba bafite ibyago biri hejuru byo kubyara abana bafite ibibazo by’ubuzima, harimo kuvuka umwana atujuje ibiro cyangwa akavuka apfuye.

Dr. Ntaganda Evariste ukora mu Ishami rishinzwe Indwara zitandura muri RBC mu kiganiro yigeze kugirana na IGIHE, yagiriye inama abantu banywera itabi hafi y’abana cyangwa abanywa itabi batwite kubihagarika mu rwego rwo kubungabunga ubuzima bwabo.

Ati “Abenshi banywa itabi ku bagore batwite bangiza abana babo, kuko babyara abana batujuje ibiro cyangwa bakavuka bapfuye. Itabi ryica urinywa n’utarinywa, ni yo mpamvu Leta y’u Rwanda yaciye umuco wo kunywera itabi mu ruhame. Ahenshi usanga abagabo ari bo banywa itabi kurusha abagore ariko umugabo ashobora kurinywa afite abana bato cyangwa umugore utwite bikaba byamugiraho ingaruka kandi bitaretse no kwangiza nyiri ukurinywa”.

Itabi rigira ingaruka nyinshi ku mubiri wa muntu, harimo kuba ritera indwara z’umutima, kanseri, diyabete, umuvuduko w’amaraso, indwara zo mu buhumekero, izo mu kanwa n’izindi.

Ku Isi yose itabi ryica kimwe cya kabiri cy’abarikoresha. Ishami ry’Umuryango w’Abibumbye ryita ku Buzima rigaragaza ko rihitana abarenga miliyoni umunani buri mwaka, abagera kuri miliyoni zirindwi bicwa n’ingaruka zo kurinywa, miliyoni 1.2 bicwa n’ingaruka baterwa n’abandi barinywa cyane cyane abarinywera mu ruhame.

Abantu bize amashuri abanza gusa nibo banywa itabi cyane mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .