Abarwayi ba diyabete miliyoni 40 bashobora kwisanga batabona umuti wa ‘Insuline’

Yanditswe na IGIHE
Kuya 22 Ugushyingo 2018 saa 11:57
Yasuwe :
0 0

Ubushakashatsi bwagaragaje ko mu gihe umubare w’abarwaye diyabete wiyongera buri munsi, kuboneka k’umuti wa ‘insuline’ ukoreshwa mu kuringaniza isukari mu mubiri bishobora kuba ingorabahizi.

Abakoze ubu bushakashatsi bavuga ko mu 2030 abagera kuri miliyoni 79 barwaye diyabete yo mu bwoko bwa kabiri bazakenera ‘Insuline’, gusa ngo kimwe cya kabiri cyabo nibo gusa bazabasha kuyibona ukurikije uko uyu munsi bihagaze.

Dr. Sanjay Basu, umwalimu wungirije mu ishami ry’ubuvuzi muri kaminuza ya Stanford muri Leta Zunze Ubumwe za Amerika, wayoboye itsinda ryakoze ubu bushakashatsi yavuze ko uburyo uyu muti ugera ku barwayi bikwiye kuvugururwa by’umwihariko mu bihugu bya Afurika, Aziya na Oceanie.

Ati “Iri gereranya rigaragaza ko uburyo ubu umuti wa insuline ugera ku bayikeneye bidahagije ugereranyije n’abayikeneye by’umwihariko muri Afurika na Aziya. Imbaraga nyinshi zikwiye gukoreshwa mu guhangana n’iki kibazo cy’ubuzima.”

Muri ubu bushakashatsi bwanyujijwe mu kinyamakuru Lancet, Dr. Basu yagaragaje ko nubwo Umuryango w’Abibumbye ushyira imbaraga mu kuvura indwara zitandura kandi umuti wa diyabete ukagezwa hose, henshi usanga bitoroshye kuba umurwayi yawubona.

Iri tsinda ryakoze ubushakashatsi rigamije kureba uko diyabete izaba ihagaze mu myaka 12 iri imbere, kugira ngo hamenyekane ‘insuline’ izaba ikenewe.

Bifashishije amakuru y’Ihuriro Mpuzamahanga rya diayabete, ndetse n’ubundi bushakashatsi 14, babashije kubona uko diyabete yo mu bwoko bwa kabiri izaba ihagaze mu bihugu 2030.

Basanze abakuru barwaye diyabete yo mu bwoko bwa kabiri bazagera kuri miliyoni 511 mu 2030 bavuye kuri miliyoni 406 bayirwaye uyu munsi.

Bariya bose ariko siko bazaba bakeneye ‘insuline’ kuko miliyoni 79 ari bo gusa bazaba bayikeneye, ukurikije uburyo uyu munsi iboneka ariko miliyoni 38 gusa akaba aribo bazajya babasha kuyibona.

Diyabete ni imwe mu ndwara zidakira, iterwa ahanini n’igabanuka ry’umusemburo wa Insuline mu maraso ushinzwe kugena ingano y’isukari mu mubiri, aho uyirwaye agaragazwa ahanini no gucika intege, kugira inyota, umwuma, kwihagarika bidasanzwe kandi inkari nyinshi n’ibindi.

Kubona umuti wa 'insuline' uhabwa abarwaye diyabete ngo bishobora kuba ingorabahizi mu myaka isaga 10 iri imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza