00:00:00 IGIHE NETWORK KN KINYARWANDA EN ENGLISH FR FRANCAIS

Abarenga 1500 barumwa n’inzoka buri mwaka mu Rwanda

Yanditswe na Hakizimana Jean Paul
Kuya 6 February 2023 saa 05:13
Yasuwe :

Ikigo cy’Igihugu Gishinzwe Ubuzima (RBC), gitangaza ko buri mwaka mu Rwanda abaturage barenga 1500 barumwa n’inzoka, kikabasaba kwirinda kwigomboza kuko biri mu bitera impfu za hato na hato, gucibwa ingingo n’izindi ngaruka.

Kurumwa n’inzoka biri mu ndwara 20 zititaweho uko bikwiye zigaragazwa n’Umuryango Mpuzamahanga wita ku Buzima, OMS.

Muri izi ndwara umunani ni zo zigaragara mu Rwanda zirimo kurumwa n’inzoka, ubuheri, kurumwa n’imbwa, inzoka zo mu nda, imidido n’izindi.

Dr Richard Nduwayezu ushinzwe ibijyanye n’ubushakashatsi ku bitaro byitiriwe Umwami Faisal, yavuze ko ubwo baherutse gukora bwagaragaje ko nyuma y’imbwa zikunze kuruma abantu benshi, inzoka ari iya kabiri mu kugira umubare munini.

Ati “Iyo badahise bajya kwivuza ubumara bw’inzoka burihuta cyane ku buryo uwo yarumye ashobora no kwitaba Imana. Ikibazo rero dufite mu Rwanda ntabwo turamenya inzoka zifite ubumara ni izihe? Kuko inzoka zose ntabwo zigira ubumara, hari izikurya ukagira igisebe ari nayo mpamvu dusaba abantu zariye kujya kwa muganga.”

Dr Nduwayezu yavuze ko hari abaturage bacibwa amaguru kubera kujya kwivuza mu Kinyarwanda [kwigomboza] bakizera imiti yaho nyuma bikazarangira bagiye kwa muganga bakererewe bikarangira nk’umuntu aciwe akaguru cyangwa akaba yanahakura ibisazi cyangwa urupfu.

Yasabye abaturage kumva ko nta kindi cyabavura ubumara bw’inzoka uretse kujya kwa muganga bakabaha imiti yabugenewe.

Uko wakwitwara mu gihe urumwe n’inzoka

Umuyobozi w’ishami rishinzwe kurwanya indwara zititaweho muri RBC, Mbonigaba Jean Bosco, yabwiye IGIHE ko kurumwa n’inzoka bikunze kugaragara mu bice birimo ubushyuhe bwinshi ndetse n’amashyamba ari naho hakunze kugaragara abantu benshi bariwe n’inzoka.

Ati “Ikintu kihutirwa rero bakwiriye gukora ni ukuhoza n’amazi meza n’isabune ubundi akirukankira kwa muganga bakamuha imiti igenda igashwanyaguza bwa bumara bwo gukomeza kugendagenda mu mubiri.”

Mbonigaba yakomeje avuga ko hari n’abahita bazirika nk’igice cy’akaguru cyangwa akaboko cyariwe n’inzoka avuga ko ibi biteza ibyago cya gice cyose waziritse byo kuba cyacibwa kuko bwa bumara bugenda bwose bukagikwiramo.

Ati “Icya gatatu umuntu agomba gukora ni ukwirinda kunywa ibintu bizamura umuvuduko w’amaraso birimo ikawa n’ibindi ndetse bakanirinda guhangayika kuko uko uhangayika niko umutima utera cyane ukarushaho gukurura bwa bumara ukabukwirakwiza mu mubiri hose, niba inzoka ikurumye tuza ntuhangayike uravurwa kandi ukire.”

Mbonigaba yanagiriye inama abantu bajyana kwa muganga umuntu uba wariwe n’inzoka kumuryamisha uruhande rw’ibumoso rwe kugira ngo bagabanye ugutera cyane k’umutima.

Yavuze ko umuntu warumwe n’inzoka adakwiriye gutwarwa ku igare ahubwo akwiriye kujyanwa mu buryo bwiza.

RBC yasabye Abanyarwanda kwirinda gusagarira inzoka mu gihe bazibonye mu ngo zabo, bakirinda kujya ahari ibihuru byinshi batambaye inkweto ndetse bakanatema ibihuru biba byegereye inzu ngo kuko biri mu bikurura inzoka.

Kugeza ubu RBC igaragaza ko nibura buri mwaka mu Rwanda abantu 1500 ari bo baribwa n’inzoka.

Dr Nduwayezu yasabye abaturage kwizera abaganga ku miti babaha mu gihe barumwe n’inzoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .