Abantu miliyari 4.5 bugarijwe n’ikibazo cyo kutagira imisarane yujuje ibyangombwa

Yanditswe na Evariste Nsengimana
Kuya 19 Ugushyingo 2018 saa 10:08
Yasuwe :
0 0

Buri tariki 19 Ugushyingo, Isi yizihiza umunsi mpuzamahanga w’ubwiherero, ukaba warahariwe gushishikariza abantu kugira isuku no kwituma ahabugenewe.

Ubwiherero bubona umugabo bugasiba undi mu bihugu bimwe na bimwe ku isi, cyane cyane ibikiri mu nzira y’amajyambere!

Ishami ry’Umuryango w’Abibumbye ryita ku buzima (OMS), rigaragaza ko nibura 62,5% by’abatuye Isi (miliyari 4.5), bugarijwe n’ikibazo cyo kutagira ubwiherero n’ababufite bukaba butujuje ibisabwa. Muri abo, miliyoni 892 bituma ku gasozi.

Rigaragaza ko abantu miliyari 1,8 bakoresha amazi bavomye mu bishanga n’ahandi hadasukuye, ku buryo bishobora gushyira mu kaga ubuzima bwabo, mu gihe 80% by’amazi ava mu misarani, abaturage bongera bakayaresha adatunganyijwe.

Si ibyo gusa kuko ngo ishuri rimwe muri atatu ku isi, usanga nta bwiherero rifite, bikaba ikibazo gikomeye cyane ku bakobwa igihe bari mu mihango kuko batabona aho bisukurira.

Inyigo iheruka ya Loni yerekanye ko buri mwaka abanyeshuri ibihumbi 140 n’abana ibihumbi 289 bicwa n’impiswi n’izindi ndwara ziterwa n’isuku nke.

Ku Isi abana miliyoni zisaga 900 ntibabona uburyo bwo gukaraba intoki, bikaba ikibazo gikomeye kuko ari uburyo bumwe bushobora gukwirakwiza indwara z’umwanda.

Iyo nyigo yerekanye ko Ethiopia iza mu bihugu bya mbere ku Isi bifite abaturage bugarijwe no kutagira ubwiherero bwujuje ibisabwa.

Mu Rwanda byifashe gute?

Ibarura riheruka gukorwa n’Ikigo cy’Ibarurishamibare mu 2015, ryagaragaje ko 83,4% by’Abanyarwanda bakoresha bakanatizanya ubwiherero bwujuje ibyangombwa.

Icyo gihe abanyamujyi bitumaga ku gasozi bitewe no kutagira ubwiherero bari 1% mu gihe mu cyaro bari 3%.

Minisiteri y’ubuzima mu Rwanda, ivuga ko ibigenderwaho kugira ngo umuntu yizere ko afite ubwiherero budashobora gushyira mu byago ubuzima bwe nko kurwara indwara ziterwa n’umwanda birimo; uburebure bwa metero nibura eshanu z’ubujyakuzimu, kuba butinze kandi bworoshye gukorerwa isuku, bwubakiye ku mpande, busakaye ndetse bunakinze.

Kutagira ubwiherero, ni imwe mu mpamvu zikomeye zituma abantu barwara indwara ziterwa n’umwanda zirimo impiswi, inzoka zo mu nda n’izindi bitewe n’uko bituma ku gasozi.

Minisante ivuga ko gukaraba amazi meza n’isabune igihe umuntu avuye mu bwiherero ndetse na mbere yo gufata ifunguro, bigabanya ibyago byo kurwara indwara ziterwa n’umwanda ku kigero cya 47%, bityo ko Abanyarwanda bakwiriye kubizirikana.

Mu 2016, hafi kimwe cya kabiri cy’indwara zakiriwe kwa muganga mu Rwanda, zari zifitanye isano n’isuku nke. Izo zirimo; impiswi, inzoka zo mu nda, igituntu, indwara zo mu kanwa, iz’uruhu na malaria.

Ubwiherero bwujuje ibyangombwa bubona umugabo bugasiba undi mu bihugu byinshi
Ubwiherero bugomba kuba butinze neza, busakaye, bukinze, bupfundikiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza