Umwongereza umwe muri batanu atekereza ko Coronavirus yakozwe n’Abayahudi

Yanditswe na Habimana James
Kuya 28 Gicurasi 2020 saa 09:28
Yasuwe :
0 0

Abashakashatsi bo muri Kaminuza ya Oxford, bagaragaje ko hari Abongereza batekereza ko icyorezo cya Coronavirus cyibasiye abatuye Isi uyu munsi, cyakozwe na Israel.

Aba bashakashatsi bavuga ko umuntu umwe mu Bongereza batanu, atekereza ko iki cyorezo cyakozwe n’Abayahudi, kugira ngo bagushe ubukungu bw’Isi naho ubwabo buzamuke.

Kuva mu Mpera w’umwaka ushize, Isi yugarijwe n’icyorezo cya Coronavirus aho cyatangiriye mu Mujyi wa Wuhan mu Bushinwa.

Kugeza ubu abantu barenga miliyoni eshanu bamaze kwandura abandi barenga ibihumbi 300 bamaze gupfa.

Mu Bwongereza, abanduye bararenga ibihumbi 260, abandi barenga ibihumbi 37 bamaze gupfa. Muri Israel abanduye bararenga ibihumbi 16, naho abandi hafi 300 bamaze gupfa.

Aba bashakashatsi bavuga ko ubu bushakashatsi bugiye hanze mu gihe hakomeje kugaragara imyitwarire abantu bamwe bafite kuri iki cyorezo.

Prof Daniel Freeman wayoboye ubu bushakashatsi ukora muri iyi Kaminuza yavuze ko “mu gihe ibikorwa bya guma mu rugo byakomerega ku Isi, gukeka ahavuye iki cyorezo nabyo byakomeje kwiyongera.”

Ubu bushakashatsi bwakozwe kuva tariki 4 kugeza tariki 11 Gicurasi uyu mwaka, bukorerwa ku bantu 2 500.

Mu babajijwe, bavuze ko “Abayahudi nibo bakoze iki cyorezo kugira ngo bagushe ubukungu bw’Isi naho ubwabo buzamuke.”

Bugaragaza ko abantu bangana na 5.3% by’ababajijwe, babyemeje gake, 6.8% babyemeye ku rwego rwo hagati, 4.6% babyemeje ko ari cyane, 2.4% bemeje ko aribyo, naho 80.8% ntabwo bigeze byabyemeza.

Muri ubu bushakashatsi, hari n’abavuze ko Abayisilamu aribo bagiye bakwiza iki cyorezo kugira ngo ngo cyibasire abatuye mu Burengerazuba bw’Isi.

Ikinyamakuru The Jerusalem Post kivuga ko abangana na kimwe cya kane cy’ababajijwe, bavuze ko hari ibyamamare ku Isi byahawe amafaranga kugira ngo bijye bivuga ko byanduye Coronavirus.

Hari n’abavuze ko Minisitiri w’Intebe w’u Bwongereza, Boris Johnson, nawe yabeshye ko yarwaye iki cyorezo.

Abandi 45.4% bo bemeje ko Coronavirus ari virusi yakozwe muri laboratwari zo mu Bushinwa, kugira ngo bwibasire ibihugu byo mu Burengerazuba bw’Isi.

Freeman avuga ko “Niba umuntu ashobora gushyira iki cyorezo ku Bayahudi, abandi bagashinja Abayisilamu, abandi Bill Gates ndetse na laboratwari, icyo tuvanamo ni uko hari imitekerereze mibi.”

Aba bashakashatsi kandi bagaragaza ko abenshi muri aba bafite iyi mitekereze, akenshi ngo usanga batanubahiriza amabwiriza y’inzego z’ubuyobzi yo kwirinda Coronavirus.

Avuga ko abenshi mu bafite iyi mitekereze, ari abafite amakuru make ku buryo usanga bayakura mu nshuti, ku mbuga nkoranyambaga na Youtube.

Umuryango urengera inyungu z’Abayuhudi b’Abongereza, uherutse kuvuga ko hari amagambo mabi amaze igihe acishwa ku mbuga nkoranyambaga, yibasira Abayahudi kubera Coronavirus.

Aba bashakashatsi bavuga ko bazakomeza gukora ubundi bushakashatsi kuri iki cyorezo no kuri iyi ngingo, kugira ngo barusheho gutanga amakuru ahamye.

Umuyobozi w’Umuryango, JNF-UK, Samuel Hayek, we avuga ivangura usanga ryarabibwe mu Bwongereza, ku buryo buri gihe iyo habaye ikintu nka Coronavirus byongera umurego w’ivangura bashinja abandi guteza ibibazo byose Isi, ati “ntabwo ntunguwe n’ibyabaye kuko ivangura rikomeje kwiyongera”.

Yavuze ko Abayahudi batuye mu Bwongereza no mu Burayi, bagomba kumenya ko ivangura rizashira ari uko bafashe amahitamo yo gusubira mu gihugu cyabo.

Abantu bakomeje kugira urujijo rwinshi ku nkomoko ya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .