Uko abahanga muri siyansi basobanura ihame ryo guhana intera mu kwirinda COVID-19

Yanditswe na Umwali Zhuri
Kuya 1 Gicurasi 2020 saa 05:04
Yasuwe :
0 0

Coronavirus ikomeje gushegesha Isi, ku rundi ruhande byinshi mu biyerekeye ntibiramenyekana kuko umunsi ku wundi ariko abahanga bashakisha, kugira ngo abantu bahabwe inama zihamye zo kwirinda mu gihe umuti n’urukingo byayo bitaraboneka.

Ikizwi ni uko COVID-19, indwara iterwa na Coronavirus, yandurira mu matembabuzi y’umuntu uyirwaye, amusohokamo mu gihe akorera cyangwa se yitsamura.

Ni byinshi abatuye Isi bamaze kugirwamo inama nk’uburyo bwabafasha kwirinda ikwirakwira ry’iki cyorezo. Bimwe muri byo, harimo ihame ryo guhana intera nibura ya metero hagati yawe na mugenzi wawe.

Ni ihame ryatangiye gukoreshwa hose, mu Rwanda kimwe no mu bindi bihugu by’Isi, ubu abantu bamaze kumenya neza ko badakwiye kwegerana. Ariko se, uku guhana intera, mu buryo bwa siyansi kuvuze iki?

Mu 1918, Isi yibasiwe n’ibicurane bikaze bizwi nka Spanish flu. Kuva tariki ya 1 Nzeri 1918 kugera ku ya 5 Mata 1919, abantu miliyoni 50 bari bamaze kwicwa n’ibyo bicurane.

Imijyi yo muri Amerika yafunze amashuri, abantu bashyirwa mu kato ndetse hashyirwaho amabwirza yo guhana intera hagati y’umuntu n’undi ku buryo byagabanyije mu buryo bwihuse umubare w’abantu bapfaga.

Umwarimu muri Kaminuza ya Michigan akaba Umuyobozi w’Ikigo cy’amateka mu by’ubuvuzi, Howard Markel, yavuze ko muri icyo gihe bari bazi neza ikiri gutera ibyo bicurane n’aho bituruka.

Ariko kubera uburyo Coronavirus amakuru yayo amenyekana umunsi ku wundi, akamaro guhana intera biri kugira kazamenyekana mu minsi iri imbere.

OMS ivuga ko hagati y’umuntu n’undi hakwiye kujyamo metero, mu kwirinda ko mu gihe umuntu akorora cyangwa yitsamura, amatembabuzi ye yagera kuri mugenzi we.

Umwarimu wigisha ibijyanye n’utunyangingo duto tutaboneshwa amaso muri Kaminuza ya Georgetown muri Leta Zunze Ubumwe za Amerika, Julie Fischer, avuga ko intera ya metero ishingiye ku bushakashatsi bwakozwe mu kinyejana cya 20 nk’intera ya hafi ishobora kugabanya ibyago byo kugerwaho n’udukoko twandura nka Rhinovirus dushobora guca mu mazuru.

Hari indwara yitwa SARS-CoV-1 yibasiye u Burasirazuba bwa Aziya mu ntangiriro za 2000. Ubushakashatsi bwagaragaje ko intera ya metero hagati y’umuntu n’undi itari ihagije mu gufasha abantu kutandura.

Hari ubushakashatsi kandi buherutse gukorwa na Kaminuza ya Massachusetts bugaragaza ko amatembabuzi ashobora kurenga iyo ntera. Gusa ntabwo bugaragaza ko mu gihe yarenga iyo ntera, yaba koko agishobora kwanduza umuntu.

Mu gihe cy’ibicurane bya H1N1, muri Amerika hashyizweho amabwiriza y’uko kwa muganga hagati y’umuntu usaba serivisi n’uyitanga, hakwiye kujyamo intera ya metero ebyiri, n’ubu hamwe na hamwe ibi bintu biracyakoreshwa.

Abahanga bavuga ko uburyo nk’ubu bwo guhana intera, icyo bufasha atari ukuvura indwara ahubwo ari ukuyikumira. Kuba COVID-19 yandura ivuye ku muntu umwe ijya ku wundi, bigaragaza neza ko mu gihe abantu baba badahura, byagabanya umubare w’abandura.

Abashakashatsi bo muri Kaminuza ya Harvard bagaragaza ko kuba nta muntu uzi igihe iki cyorezo kizarangira, bikwiye ko ihame ryo guhana intera rikomeza gushyirwamo imbaraga nibura kugera mu 2021.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Umuntu ugaragaza ibimenyetso bya Coronavirus asabwa guhamagara ku 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.

Kutegerana ni uburyo bworoshye bufasha mu kurinda ikwirakwira rya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .