00:00:00 IGIHE NETWORK KN KINYARWANDA EN ENGLISH FR FRANCAIS

Ubwoko bushya bwa Covid-19 bwitezwe ku bwinshi

Yanditswe na Dufitumukiza Salathiel
Kuya 25 Ugushyingo 2021 saa 03:36
Yasuwe :
0 0

Abashakashatsi bashimangiye ko hazakomeza kugenda haboneka ubundi bwoko bwa Coronavirus yihinduranya kandi ifite ubukana kurusha izindi. Icyakora batanze ihumure ko inkingo zemejwe kugeza ubu ntaruzabura ubushobozi bwo guhangana nayo.

Magingo aya Coronavirus yihinduranya iteje inkeke ni iyiswe “Delta plus [AY.4.2]” yakomotse ku yiswe “Delta”.

Hagaragazwa ko Delta plus yandura inshuro ziri hagati ya 10 na 15 ugereranyije na Delta.

Ni mu gihe Delta ubwayo bivugwa ko uwayanduye aba afite utunyangingo twa virus mu mazuru (dushobora kwanduza abandi) dukubye inshuro 1.200 utw’uwanduye Coronavirus isanzwe ya Sars-Cov-2 kandi akagaragaza ibimenyetso mu minsi ibiri cyangwa itatu.

Ishami ry’Umuryango w’Abibumbye ryita ku Buzima (OMS) rigaragaza ko 99,5% by’ubwandu bwa Coronavirus buri kuboneka muri iyi minsi, ari ubwa Delta.

Abahanga mu birebana n’ibyorezo bakunze kwita iyo Delta Plus ko ari “umwuzukuru” kuko yaturutse kuri virus yihinduranyije. Bemeza ko hazakomeza kuvuka n’izindi uko iminsi yicuma ndetse ko hazaza n’iyirusha ubukana n’ubwo hatakwemezwa ngo ni ryari.

The Guardian yatangaje ko abashakashatsi bibanda kuri iyo ngeri bo muri Leta Zunze Ubumwe za Amerika bahura buri cyumweru hifashishijwe ikoranabuhanga bakaganira ku bwoko bushya bwa Coronavirus yihinduranya buri kuvugwa hirya no hino ku Isi.

William Hanage wigisha muri Kaminuza ya Harvard, yagaragaje ko Coronavirus “imeze nk’ikirere” bityo ko impinduka zigomba guhora zitezwe.

Ati “Twagiye twumva ngo hariya habonetse Gamma, aha habonetse Alpha ariko ubu ni Delta.”

Ubwo bwose ni ubwoko bwa Coronavirus zihinduranya zagiye zigaragara mu bihe bitandukanye kandi zikaza zandura vuba zikanarembya abazanduye kurusha Sars-Cov-2.

Ravi Gupta wigisha muri Kaminuza ya Cambridge, yavuze ko ashobora guhamya ku kigero cya 80% ko hazaza n’ubundi bwoko bushya nubwo atahamya ngo ni ryari.

Yagize ati “Ubu twamaze kubona Delta. Iyi Delta plus nshya iraciriritse ugereranyije n’ubwoko bw’iyo yindi ndi kuvuga [izaboneka]. Ifite utunyangingo tubiri twihinduranyije muri Delta kandi ndatekereza ko bidahangayikishije cyane ndetse ntiragaragara cyane mu bihugu byinshi.”

“Gusa ikitakumirwa ni uko hazabaho ubundi bwoko bwihinduranya mu myaka ibiri iri imbere kandi bukaza buhangana na Delta ndetse bukaba bushobora kuzaba buyirusha ubukana.”

Hagati aho igiteye impungenge ni uko hanemezwa ko uko kugenda havuka ubwoko bushya buzajya buza bufite ubukana kandi bukihagararaho imbere y’inkingo.

Francis Balloux uyobora UCL Genetics Institute yo muri Kaminuza ya Londres mu Bwongereza, yagize ati “Niteze ko ubwoko bw’impinduka tuzabona buzaba ari icyo twita ‘utunyangingo twa virus tuzi imiterere y’inkingo’ aho usanga uko virus yihinduranya biyongerera ubushobozi bwo gukwepa abasirikare b’umubiri.”

Yibukije ko ku zindi ndwara z’ubuhumekero nk’ibicurane ho bizwi ko “bitwara imyaka 10 kugira ngo virus ibe yamaze kwiremamo impinduka zituma idahangarwa n’abasirikare bo mu maraso”.

Aho ni ho bahera berekana ko uko hakomeza kuvuka ubwoko bushya bwa Coronavirus zihinduranya ariko n’icyizere cy’uko inkingo zarinda abantu kigenda kigabanuka kuko zizajya ziba zifitemo utunyangingo tuzi imiterere yazo.

Kuri icyo, hari ibigo byatangiye gukora ikindi cyiciro cy’inkingo zizagenda zifashishwa mu minsi iri imbere ziswe “second generation COVID-19 vaccines” zitezweho kuzahangana n’ubwo bwoko bwihinduranya.

Nka Novavax na Gristone yo muri Leta Zunze Ubumwe za Amerika hari izo batanze ziri mu isuzuma. Byitezwe ko hagati y’ubu na 2023 hari nyinshi zizaba zimaze gukorwa ziri muri icyo cyiciro.

Ku rundi ruhande, abo bashakashatsi bashimangiye ko kwishingikiriza inkingo gusa bidahagije mu gihe Isi ishaka guhashya COVID-19.

Batanga inama ko “nubwo umuntu yaba yakingiwe akwiye gukomeza kubahiriza amabwiriza yo kwirinda icyorezo” harimo kutajya mu kivunge cy’abantu benshi, kwambara agapfukamunwa no gukaraba intoki kenshi.

Ibyo ngo ni byo bizagabanya ibyago byo kuba virus zihinduranya zakomeza kuboneka hirya no hino.

Gupta yagize ati “Ntabwo twagombye gukomeza kujya ahahurira benshi tutambaye udupfukamunwa nubwo bigoye kubikora. Witegereje ahagiye haboneka ubwoko bwihinduranya, ni mu bihugu birimo abantu benshi ndetse hatitabwa ku guhagarika ikwirakwizwa ry’ubwandu nko mu Buhinde, u Bwongereza na Brésil. Hari impamvu tutigeze twumva ubwoko bwihinduranya bwabonetse bwa mbere muri Singapore cyangwa Koreya y’Epfo.”

Icyakora hatanzwe icyizere ko inkingo zihari ubu zitazatakaza ubushobozi bwose kuri virus zihinduranya.

Ubwiyongere bw’ubwandu buri kugaragara mu bihugu byiganjemo ibyo mu Burayi aho COVID-19 yongeye kubura umutwe, nabwo buri mu bitiza umurindi ivuka rya virus zihinduranya.

Ibyo bishingira ku kuba umurwayi ashobora kurwara icyo cyorezo maze ubudahangarwa bw’umubiri we ntibushobore kukirandura burundu. Icyo gihe twa tunyangingo duke twa virus twasigaye mu mubiri twiga uko abasirikare bakora bityo tukamenya uko tubasha kubakwepa.

Mu gihe dukwirakwiye, tuza mu yindi sura ku buryo inkingo ziba zitaduhashya nk’uko byakagombye kugenda.

Abarenga miliyoni 259 ni bo bamaze kwandura COVID-19 mu Isi yose. Abarenga miliyoni 5 bahasize ubuzima, naho miliyoni 234,8 barayikize.

Abashakashatsi bagaragaje ko hazakomeza kugaragara ubwoko bushya bwa Coronavirus kandi bufite ubukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .