00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rumaze kwakira inkingo miliyoni 12.9; abagomba gukingirwa bageze kuri miliyoni 9

Yanditswe na Ishimwe Israel
Kuya 3 Ukuboza 2021 saa 08:28
Yasuwe :

Minisitiri w’Intebe, Dr Edouard Ngirente, yatangaje ko u Rwanda rumaze kwakira inkingo zigera kuri 12.900.760 kuva rutangiye ibikorwa byo gukingira mu gihe abagomba kuzihabwa biyongereye bakagera kuri miliyoni icyenda.

Yabitangaje kuri uyu wa Gatanu, tariki ya 3 Ukuboza 2021, ubwo yagezaga ku Nteko Ishinga Amategeko, Imitwe yombi, ibikorwa bya Guverinoma bijyanye na gahunda yo gukingira abaturage icyorezo cya COVID-19 n’izahuka ry’ubukungu.

Kuva ku wa 13 Werurwe 2020 ubwo umurwayi wa mbere wa COVID-19 yabonekaga mu Rwanda kugeza ku wa 2 Ukuboza 2021, hafashwe ibipimo 3.497.196; abanduye ni 100.381, barimo abagabo barenga ibihumbi 48 [48%] mu gihe abagore ari 51.250 [52%].

Muri aba 100.381 banduye COVID-19, abatarengeje imyaka 29 ni 38.347 bangana na 38%, naho abafite imyaka 30 kuzamura ni 62.034 bangana na 62%.

Raporo ya Minisiteri y’Ubuzima yerekana ko abakize COVID-19 ari 98.830 [98%] mu gihe abarwaye ari 208 barimo 175 barwariye mu ngo zabo. Abahitanywe n’iki cyorezo ni 1343 barimo abagabo 726 [54%] mu gihe abagore ari 617 [46%].

Mu guhangana n’ubwandu bwa COVID-19, ku wa 5 Werurwe 2021, ni bwo u Rwanda rwatangiye ibikorwa byo gukingira ndetse intego y’abagombaga gukingirwa ishobora kugerwaho mbere y’igihe cyagenwe.

Minisitiri w’Intebe, Dr Ngirente, yagize ati “Kubera ubukangurambaga bwakozwe, umubare w’abitabira kwikingiza urushaho kwiyongera. Kuva u Rwanda rwatangira gahunda yo gukingira COVID-19 kugeza ku wa 2 Ukuboza 2021, abaturage 6.065.691 bangana na 46% bamaze guhabwa byibura dose imwe y’urukingo.’’

Kugeza ubu mu Rwanda, abamaze gukingirwa byuzuye bagera ku 3.625.636.

Ishami ry’Umuryango w’Abibumbye ryita ku Buzima (WHO) ryasabye ko bitarenze tariki 30 Nzeri 2021 nibura buri gihugu kizaba cyakingiye nibura 10% by’abagituye ndetse u Rwanda ruri mu bihugu bike byayigezeho.

Minisitiri w’Intebe Dr Ngirente ati “Twihaye intego yo gukingira 30% (3.915.533) by’Abanyarwanda bitarenze Ukuboza na 60% (7.831.066) bitarenze 2022. Ndababwira ko izi ntego turi hafi kuzirenza.’’

-  Umubare w’abagomba gukingirwa wariyongereye

Minisitiri w’Intebe, Dr Ngirente, yavuze ko nyuma yo kwiyemeza gukingira COVID-19 ingimbi n’abangavu bafite imyaka 12-17, abazahabwa urukingo bageze kuri 9.063.245 [69,4%], bose bazakingirwa mu mwaka utaha.

Ati “Aba bose bazaba bamaze gukingirwa bitarenze Ukuboza 2022 ariko dukurikije imbaraga tubishyiramo dushobora no kubigeraho mbere yaho.’’

Mu Mujyi wa Kigali uhereye ku bafite imyaka 12 kuzamura, abangana na 869.909 [89.2%] bamaze guhabwa dose zombi mu gihe abamaze guhabwa byibura dose ya mbere ni 1.032.499.

Mu zindi ntara enye, muri iki cyiciro, abangana na 2.755.727 [34%] bamaze guhabwa dose zombi mu gihe abahawe imwe ari 5.033.192 [62%].

U Rwanda rukoresha ubwoko bw’inkingo umunani. Kugeza ku wa 2 Ukuboza 2021, rwari rumaze kwakira inkingo 12.900.760 zishobora gukingira abaturage 6.736.220 hatabariwemo urukingo rushimangira (dose ya gatatu).

Izi nkingo zaturutse ahantu hatandukanye nko muri gahunda y’ubufatanye mu kugeza inkingo hose ku Isi yiswe COVAX, hari izo rwiguriye ku ngengo y’imari yarwo n’izo twabonye binyuze mu bucuti n’ibindi bihugu.

Minisitiri w’Intebe, Dr Edouard Ngirente, yatangaje ko u Rwanda rumaze kwakira inkingo zigera kuri 12.900.760 kuva rutangiye ibikorwa byo gukingira abaturarwanda
Iki gikorwa cyabaye hifashishijwe ikoranabuhanga
Abaturarwanda bagomba gukingirwa bageze kuri miliyoni icyenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .