U Rwanda rugeze kure rugerageza ‘Rapid test’, itanga ibisubizo bya Covid-19 munsi y’iminota 30

Yanditswe na Iradukunda Serge
Kuya 18 Kanama 2020 saa 06:45
Yasuwe :
0 0

Inzego z’ubuzima mu Rwanda zatangaje ko zimaze iminsi zigerageza ubuziranenge n’imikorere y’ibipimo bya Covid-19 bitanga ibisubizo mu buryo bwihuse “Rapid Test” byo mu bwoko bwa” Standard Q COVID-19 Ag Test na Standard COVID-19 IgM/AgG Combo” .

Test Rapid isanzwe ikoreshwa mu Rwanda mu gupima izindi ndwara nk’agakoko gatera Sida na Malaria ariko bikaba ari ubwa mbere igiye gukoreshwa mu gupima icyorezo cya Covid-19.

Mu gupima iki cyorezo, u Rwanda rusanzwe rukoresha uburyo bwa ‘PCR’, aho uwapimwe ashobora kubona ibisubizo bye hagati y’amasaha arindwi n’umunani.

Kuba mu Rwanda hatangira gukoreshwa ubu buryo bwa ‘Rapid Test’ byatangajwe kuri uyu wa 18 Kanama ubwo Laboratwari nkuru y’igihugu yashyikirizwaga ibikoresho bifite agaciro k’ibihumbi mirongo itanu by’amadorali y’Amerika (50,000 USD) byifashishwa mu gupima Covid-19 muri ubu buryo bwihuse.

Ni ibikoresho yahawe n’Ikigo Africa Medical Supplier ku bufatanye n’Uruganda rwo muri Koreya y’Epfo cya SD Biosensor Inc. rumenyerewe cyane mu gukora “Rapid Test” nk’izipima isukari (Diabetes) nk’izitwa Code-free zimenyerewe hano mu Rwanda.

Uwari uhagarariye Laboratwari Nkuru y’igihugu, Dr Ivan Mwikarago, ubwo yashyikirizwaga ibi bikoresho mu izina rya Minisiteri y’Ubuzima, yavuze ko mu igerageza bamaze iminsi bakora basanze ubu buryo bwihuse bwo gupima Covid-19 nabwo bwatangira gukoreshwa mu Rwanda.

Yagize ati “Ubundi ntabwo twajyaga dukoresha uburyo bwa ‘rapid test’, mu gupima Covid-19; ariko nyuma y’uko amageragezwa yakozwe yerekanye ko ubu buryo bwizewe kandi bushobora gutanda umusaruro; hagiye gutangira gahunda yo gupima abantu Covid-19 hakoreshejwe uburyo butanga ibisubizo mu gihe gito ‘ RAPID TEST”.

Dr Mwikarago avuga ko ibi bikoresho bipima Covid-19 mu buryo bwihuse bahawe bazabiheraho bagenzura uko ubu buryo bukora basanga bukora neza bakazagura ibindi.

Yagize ati “Izo twahawe ni 5000 turazikoresha tureba niba koko ziduha ibisubizo nk’uburyo dusanganywe; nidusanga nta kibazo ubwo tuzatumiza n’izindi ku buryo twatangira gukoresha uburyo bwa rapid test mu gupima Covid-19 ku bantu benshi kandi mu bice byose by’igihugu”.

Uburyo bwa ‘PCR’ busanzwe bukoreshwa n’u Rwanda mu gupima Covid-19, bwatangaga ubushobozi bwo gupima nibura abantu bari hagati ya 2500 na 5000 ku munsi, uyu mubare ukaba wakwiyongera mu gihe ubu buryo bwa Rapid Test bwaba butangiye gukoreshwa.

Umuyobozi wa Africa Medical Supplier, Fabrice Shema Ngoga, yavuze ko ibi bikoresho batanze bizakoreshwa mu gupima abantu benshi mu gihe gito.

Ati “Ibi bikoresho bizifashishwa hanze kugira ngo bibashe gupima abantu benshi mu buryo bwihuse kandi umuntu akabasha kubona ibisubizo bye bitarenze iminota 15” .

Yakomeje agira ati “Mu gihe muzi neza ko nta muti uraboneka uhamye ikintu dushobora gusa gukora ni ugupima abantu benshi bashoboka cyane ahantu hahurira abantu benshi kandi umuntu akabasha kubona ibisubizo bye bitarenze iminota 15”.

Ubu buryo bwo gupima Covid-19 byihuse bwatangiye gukoreshwa mu bihugu byazahajwe cyane na Covid-19 nk’u Bushinwa, u Buhinde hagamije gufata umubare munini w’ibipimo kandi ba nyirabyo bakabona ibisubizo byabo mu gihe gito.

Ibi bikoresho byatanzwe na Africa Medical Supplier bifite agaciro k'ibihumbi 50 by'amadolari
Ngoga Fabrice ashyikiriza Dr Ivan ibi bikoresho bipima Covid -19 mu buryo bwihuse
Umuyobozi wa Africa Medical Supplier Ngoga Fabrice yavuze ko ibi bikoresho batanze bizafasha kurushaho gupima Covid -19 umubare munini w'abantu
Umuyobozi wa Laboratwari nkuru y'igihugu Dr Ivan yavuze ko bamaze igihe bagerageza ubu buryo bwihuse bwo gupima Covid-19
Utu dukoresho dushobora gupima Covid -19 tugatanga ibisubizo mu minota 30

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .