Televiziyo, igitanda cyisanzuye: Imiterere y’icyumba cyakirirwamo abasuzumwa COVID-19 mu Rwanda

Yanditswe na Cyprien Niyomwungeri
Kuya 27 Werurwe 2020 saa 12:41
Yasuwe :
0 0

Minisiteri y’Ubuzima yatangaje ko abantu bahuye n’abagaragayeho icyorezo cya COVID-19, bakomeje kwitabira gahunda yo kwisuzumisha kugira ngo batagumya kwanduza batabizi, abo mu miryango yabo, inshuti n’abaturanyi.

Minisitiri w’Ubuzima Dr Ngamije Daniel, mu kiganiro Ishusho y’Umunsi cyatambutse kuri RTV, yavuze ko ntawe ukwiye kugira impungenge zo kwisuzumisha kuko u Rwanda rufite ahantu hakwiriye bakirirwa, abakozi babihuguwemo, ibikoresho byo kubitaho.

Ati “Ntabwo ari gereza baba bajemo. Baba bafite ukwisanzura ku buryo bashobora kuguma bavugana n’imiryango yabo, nta cyagombye kubabuza kuza aho hantu”.

Minisitiri Dr Ngamije avuga ko u Rwanda rufite ahantu hageze kuri hatandatu hakirirwa abo bantu, aho bavurirwa ni habiri naho aho kwita ku bagisuzumwa bagikeneye gupimwa kugira ngo hamenyekane niba baranduye ni ahantu hane.

Akomeza yerekana imiterere y’icyumba urimo gusuzumwa ahabwa n’ibindi nkenerwa agenerwa na leta ku buntu.

Ati “Ni inzu iba ifite ibyumba byinshi, byiza binini harimo na televiziyo mu cyumba cya buri muntu, harimo ubwiherero muri icyo cyumba, igitanda kinini cya ‘double’ gifite ibyangombwa byose, ku buryo uwo muntu aba yisanzuye”.

Uri muri icyo cyumba aragaburirwa mu gitondo, saa sita na nimugoroba, ubundi agasuzumwa akabwirwa gutegereza igisubizo cye yamara kukibona, niba agaragayeho ubwandu akajyanwa aho kwita ku bantu bafite ubwandu.

Niba kandi igisubizo cye kigaragara ko atarandura cyangwa se atarwaye, inzego z’ubuzima zifite iminsi 14 yo kumukurikirana bya hafi kubera ko uko COVID-19 iteye, ni uko umuntu ashobora kugira igisubizo kigaragaza ko atarwaye mu minsi ya mbere ariko nyuma y’iminsi itatu, ine wasubiramo ugasanga uwo muntu yaranduye.

Minisitiri Dr Ngamije asobanura ko ‘Ntabwo umuntu yishyura, ntabwo yishyura gucumbika, ntabwo yishyura amafunguro afata, byose leta niyo ibyishyura’.

Asobanura ko nk’umubyeyi ufite umwana nawe agira icyumba ndetse akagira n’aho ashyira umwana we. Niba ari umwana muto birumvikana baba bari kumwe, niba ari umwana mukuru hari icyumba ku ruhande aba afite mu gihe bombi bakekwaho buriya burwayi.

U Rwanda rwishyura buri kimwe kigenda ku muntu urimo gusumwa COVID-19, mu gihe mu bindi bihugu babishyuza akayabo. Urugero nko muri Kenya, abashyizwe mu kato basabwe kwishyura amadolari arenga 1200 y’iminsi bazamara mu kato.

Minisiteri y’Ubuzima ivuga ko abarwayi ba Coronavirus mu Rwanda, bameze neza, bari mu byiciro bitandukanye harimo abakuze, abari mu cyiciro kiringaniye cy’imyaka n’abana batoya bafite munsi y’imyaka 10. Abenshi bari hagati y’imyaka 20 na 45, bake nibo barengeje imyaka 60.

Minisitiri Ngamije ati “Bameze neza, barimo abanyafurika, abanyamahanga...aba mbere bazasohoka mu cyumweru gitaha”.

Akomeza avuga ko aba bantu bitemewe kubasura ariko bakomeza kuvugana n’imiryango yabo nk’uko bisanzwe binyuze mu itumanaho.

Minisiteri y’Ubuzima yatangaje ko abantu barwaye Coronavirus bamaze kuba 50 nyuma y’uko kuri uyu wa Kane hagaragaye abandi icyenda, na none biganjemo abari baherutse gukorera ingendo mu mahanga.

Abarenga 900 bamaze gukurikiranwa harebwa niba baba bataranduye iki cyorezo nyuma yo guhura n’abo kimaze kugaragarwaho.

Gusuzuma Coronavirus mu Rwanda byashyizwemo imbaraga nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .