Perezida Kagame yayoboye Inama y’Abaminisitiri yabaye hifashishijwe ikoranabuhanga ry’amashusho

Yanditswe na Ishimwe Israel
Kuya 1 Mata 2020 saa 10:23
Yasuwe :
0 0

Perezida Kagame yayoboye Inama y’Abaminisitiri idasanzwe yabaye hifashishijwe ikoranabuhanga ry’amashusho (video conference) mu rwego rwo kwirinda ikwirakwira ry’icyorezo cya COVID-19 giterwa na Coronavirus.

Umukuru w’Igihugu yayoboye iyi nama ari muri Village Urugwiro, kuri uyu wa Gatatu, tariki ya 1 Mata 2020.

Perezida Kagame yari kumwe na Minisitiri w’Intebe, Dr Ngirente Edouard n’abandi baminisitiri ariko abenshi bayikurikiye bari mu ngo zabo nkuko bigaragara ku mashusho.

Abari muri Village Urugwiro bubahirije guhana intera hagati yabo ndetse hari n’aho Umukuru w’Igihugu agaragara asa n’ubasuhuza ariko aatabakoze mu kiganza.

Urukuta rwa Twitter ya Perezida Kagame ntirwatangaje ibyari ku meza y’ibiganiro, Umukuru w’Igihugu yagiranye n’abaminisitiri.

Bitewe n’ibihe Isi n’u Rwanda byo guhangana n’ikwirakwira rya Coronavirus, nta gushidikanya ko haganiriwe ku ngamba zashyizweho mu guhangana n’iki cyorezo.

Perezida Kagame kandi ku wa 26 Werurwe 2020 yitabiriye inama idasanzwe yiga ku cyorezo cya COVID-19 yahuje abayobozi b’ibihugu bikize ku Isi byibumbiye mu Muryango G20 harebwa uburyo bwo guhangana n’ingaruka zacyo. Nayo yabaye mu buryo bw’iyakure hifashishijwe ikoranabuhanga ry’amashusho.

Kuva umurwayi wa mbere wa Coronavirus atahuwe mu Rwanda ku wa 14 Werurwe 2020, mu gihugu hamaze kuboneka abantu 82 banduye Coronavirus.

Ku mugoroba wo ku wa 21 Werurwe 2020 nibwo Minisitiri w’Intebe Dr Edouard Ngirente, yatangaje ko kubera intera icyorezo cya Coronavirus kimaze gufata, imipaka yose ifunzwe, ko abadafite ibikorwa byihutirwa cyangwa abashobora gukomeza akazi bagomba kuguma mu rugo mu gihe cy’ibyumweru bibiri gishobora kongerwa, mu gukumira ikwirakwira rya Coronavirus.

Kugeza kuri uyu wa Gatatu, iminsi 11 muri 14 yemejwe iruzuye, imibare igaragaza ubwandu bushya bwa Coronavirus nayo ikomeje kuzamuka, ariko itanga icyizere. Nta bwandu burahererekanywa hagati mu gihugu.

Inzego z’ubuzima zitangaza ko hari icyizere ko mu mpera z’iki cyumweru umurwayi wa mbere mu bari kwitabwaho aza kurekurwa, akava mu bitaro cyane ko nta bimenyetso bya Coronavirus akigaragaza.

Perezida Kagame mu butumwa yatanze ku wa 27 Werurwe 2020 yahumurije Abanyarwanda mu bihe igihugu kiri mu ngamba zikomeye zo kurwanya ikwirakwira rya Coronavirus, abasaba gukomeza kubahiriza amabwiriza yashyizweho, avuga ko leta yiteguye gukora ibishoboka byose mu gusigasira imibereho myiza y’abaturage muri rusange by’umwihariko abatishoboye.

Yasabye Abanyarwanda kugira uruhare mu iyubahirizwa ry’amabwiriza agamije ko iki cyorezo kidakomeza gukwirakwira hose, bakihanganira ingorane zose yaba yarabateye.

Kuguma mu rugo, gusiga intambwe ndende hagati yawe n’abandi, gukaraba intoki neza kandi kenshi, kwitabaza ubuyobozi igihe ugaragaje ibimenyetso by’uburwayi; ni bimwe mu byo Perezida Kagame yashishikarije Abanyarwanda gukurikiza muri ibi bihe.

Perezida Kagame asuhuza abaminisitiri bake bari bateraniye muri Village Urugwiro aho yayoboreye inama idasanzwe
Perezida Kagame ku wa 1 Mata 2020 yayoboye Inama y’Abaminisitiri yabaye hifashishijwe ikoranabuhanga ry’amashusho rizwi nka Video Conference
Perezida Kagame yari akijijwe na Minisitiri w'Intebe, Dr Ngirente Edouard (iburyo) na Minisitiri w'Ububanyi n'Amahanga, Dr Biruta Vincent
Inama y’Abaminisitiri yemeje ingamba zigamije kugabanya izahara ry’ubukungu rishobora guterwa n’icyorezo cya COVID-19 no gukomeza gufasha Abanyarwanda babuze amikoro kubera ingaruka zacyo

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .