Perezida Kagame yashimiye umuhate w’Abanyarwanda mu gukurikiza ingamba zo kwirinda COVID-19

Yanditswe na Twarabanye Venuste
Kuya 10 Nyakanga 2020 saa 09:37
Yasuwe :
0 0

Perezida Paul Kagame yashimiye Abanyarwanda bigomwe ubuzima busanzwe bakumvira kandi bagakurikiza amabwiriza yo kwirinda COVID-19 ndetse bikaba biri gutanga umusaruro mu guhashya icyo cyorezo ku ruhande rw’u Rwanda.

Ku wa 14 Werurwe 2020 nibwo Umuhinde wageze mu Rwanda ku wa 8 Werurwe 2020 avuye i Mumbai, yatahuweho COVID-19 iterwa n’agakoko ka Coronavirus.

Igihugu cyahise gifata ingamba zitandukanye zo kwirinda icyo cyorezo cyane ko cyari kimaze iminsi cyumvikana mu bindi bihugu, ubukana bwacyo bumaze kumenyekana. Mu ngamba zafashwe harimo no gusaba abaturarwanda kuguma mu ngo zabo mu kwirinda ikwirakwira rya Coronavirus.

Mu kiganiro kigaruka ku rugendo rw’imyaka 26 rwo kwibohora k’u Rwanda yahaye urubyiruko rukoresha imbuga nkoranyambaga kuri uyu wa 10 Nyakanga 2020, Perezida Kagame yagarutse ku musaruro wavuye mu kubahiriza izo ngamba kw’Abanyarwanda.

Yavuze ko ari icyorezo cyaje ku Isi yose nta muntu wavuga ko afite igisubizo cyacyo uretse gukurikiza ibyakivugwagaho bishingiye kuri siyansi n’abahanga mu by’ubuzima ndetse umuti wacyo ukaba ubufatanye mu kucyirinda hagati y’ibihugu.

Ku ruhande rw’u Rwanda, Perezida Kagame yavuze ko bimaze kumenyekana ko hari uburyo abantu bacyifatamo mu kucyirinda, hashyizweho amabwiriza yo kucyirinda ndetse Abanyarwanda barayakurikiza.

Yavuze ko byagize ingaruka ku buzima bw’abantu kubera kutajya mu mirimo no gukora ibindi bakoraga mu buzima busanzwe, ariko kubyumva Abanyarwanda bakabikurikiza byatanze umusaruro.

Yagize ati “Nabyo ubwabyo bifite izindi ngaruka aho twagiye tubuza abantu kugira aho bajya bakaguma mu ngo zabo, ubwo birumvikana ko abantu baba batagishoboye gukora imirimo ibatunze basanzwe bikorera [….] ariko twagombye kubikurikiza.’’

Yavuze ko gukurikiza izo ngamba byavuyemo umusaruro wo gutera intambwe ikomeye mu guhangana n’icyo cyorezo, kubona abacyanduye no kubaha ubuvuzi bukeneye.

Ati “Nk’u Rwanda twageze kuri byinshi kubera iyo gahunda, abantu babyitabiriye ndetse no kumenya abo iriya virus yagezeho cyangwa abayanduye, kumenya uko tubakurikirana bakavurwa bagahabwa ibishobora guhabwa abo yagezeho. abantu benshi bagiye bakira ndetse abakize baruta abo dufite [abarwaye] ubu ngubu.”

Umukuru w’Igihugu yavuze ko Abanyarwanda bagaragaje ubufatanye muri gahunda zose zo kurwanya icyo cyorezo ku buryo ubu u Rwanda ruri mu bihugu bihagaze neza mu rugamba rwo kugohashya.

Ati ‘‘Byatewe nuko Abanyarwanda ubwabo n’abayobozi mu nzego zitandukanye, abakora iby’ubuzima bose, buri muntu yakoze ibyo ashoboye akurikiza amabwiriza akurikiza ibigomba gukurikizwa. Tukaba duhagaze neza mu buryo bwo guhangana n’icyo cyorezo.’’

Abantu 1210 nibo bamaze kwandura Coronavirus mu Rwanda, abagera kuri 623 barayikize naho batatu nibo bamaze kwitaba Imana bayizize.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

U Rwanda rwashyize imbaraga mu gupima abantu benshi mu kureba uko icyorezo gihagaza mu baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .