Mu Rwanda habonetse abarwayi bashya 30 ba Coronavirus, abayikize ni batandatu

Yanditswe na Ishimwe Israel
Kuya 15 Kamena 2020 saa 09:22
Yasuwe :
0 0

Abantu 30 basanganywe Coronavirus mu bipimo 2908 byafashwe uyu munsi bituma abayanduye mu Rwanda bagera kuri 612 mu gihe batandatu bakize, umubare w’abamaze gusezererwa mu bitaro uba 338.

  • Abanduye ni 612 (Barimo 30 bashya)
  • Abakize ni 338 (Barimo batandatu bashya)
  • Abakirwaye ni 272
  • Abantu babiri bamaze kwitaba Imana
  • Ibipimo bimaze gufatwa ni 94 059 (Ibipimo bishya 2908)

Itangazo rya Minisiteri y’Ubuzima ryo kuri uyu wa Mbere ryerekana ko abarwayi bavuye mu bice bitandukanye by’igihugu.

Rikomeza rigira riti ‘‘Abarwayi bashya bagaragaye muri Rusizi, Rusumo ndetse no mu Banyarwanda batashye.’’

Ni ubwa mbere mu Rwanda hagaragaye abarwayi benshi mu minsi yikurikiranya kuko mu minsi itatu gusa habonetse abarwayi 102, basanganywe Coronavirus. Biganjemo abo mu Karere ka Rusizi n’aka Kirehe, aho ubwandu buhava bufitanye isano n’ingendo zambukiranya umupaka.

Umurwayi wa mbere wa COVID-19 iterwa n’agakoko ka Coronavirus yagaragaye mu Rwanda ku wa 13 Werurwe 2020, kuva icyo gihe hamaze kuboneka 612 bayanduye mu bipimo 94 059 bimaze gufatwa, 338 barayikize mu gihe 272 bakirwaye naho babiri barimo umushoferi w’imyaka 65 n’umupolisikazi bitabye Imana.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 8 066 839 bamaze kuyandura ku Isi yose, barimo 437 296 yahitanye mu gihe 4 175 267 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .