Ku nshuro ya kabiri, mu Rwanda habonetse abantu 101 banduye COVID-19 mu munsi umwe

Yanditswe na Ishimwe Israel
Kuya 16 Kanama 2020 saa 11:00
Yasuwe :
0 0

Minisiteri y’Ubuzima yatangaje ko abantu 101 barimo 80 bo mu Mujyi wa Kigali basanzwemo Coronavirus mu bipimo 4796 byafashwe mu masaha 24 ashize, bituma abamaze gusangwamo ubu burwayi mu Rwanda bagera ku 2453.

Itangazo rya Minisante rigaragaza ko abarwayi bashya bakuwe mu bice bitandukanye ariko abenshi ni abo muri Kigali.

Rigira riti “Kigali:80 (bapimwe ahibasiwe kurusha ahandi harimo isoko rya Nyabugogo), Rusizi:9, Rubavu:9, Nyamasheke:2, Huye:1.’’

Mu Mujyi wa Kigali hakomeje kugaragara ubwandu bushya bwiyongera ubutitsa kuko mu minsi itatu gusa, abantu 219 basanganywe Coronavirus. Aba biganjemo abakuwe mu masoko ya Nyarugenge no kwa Mutangana ndetse no muri Minisiteri zitandukanye.

Ni ku nshuro ya kabiri mu Rwanda habonetse abantu 101 banduye mu munsi umwe, byaherukaga tariki ya 29 Kamena 2020. Icyo gihe mu basanganywe ubwandu barimo abakuwe muri “Kigali:22, Rusizi:3, Rubavu:2, Kayonza:1, Kirehe:1 & mu itsinda ry’abagororwa muri Ngoma:72 bahuye n’abanduriye i Rusumo.’’

Minisante kandi yatangaje ko kuri iki Cyumweru, tariki ya 16 Kanama 2020, abantu 17 aribo bakize Coronavirus basezererwa mu bitaro.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda, hamaze kuboneka 2453 banduye mu bipimo 334 270 bimaze gufatwa, 1648 barayikize mu gihe 797 bakiri mu bitaro naho umunani bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .