Izingiro ry’ubwiyongere bw’indembe: Kwitiranya ibicurane bisanzwe n’ibimenyetso bya COVID-19 (Video)

Yanditswe na Uwimana Abraham
Kuya 26 Mutarama 2021 saa 01:22
Yasuwe :
0 0

Imibare y’abandura n’abahitanwa na Coronavirus mu Rwanda iriyongera ubutitsa ndetse byanatumye igihugu cyongera ubushobozi bwo kwita ku ndembe zayo. Guverinoma y’u Rwanda ifite ubushobozi bwo kwakira abarwayi 500 ba Coronavirus barembye cyane.

Umuntu avugwa ko ari indembe iyo afite ikibazo cyo guhumeka ku buryo amaraso adatembera neza mu mubiri. Anagira umuriro no gucika intege cyane, kuribwa mu ngingo n’ibindi birimo gukorora.

Kwita ku ndembe za COVID-19 bisaba ubushobozi buhambaye kuko dufashe nk’urugero hari abarwayi bagiye bakenera litiro icumi z’umwuka ku munota kugira ngo babashe guhumeka.

Minisiteri y’Ubuzima yahishuye ko imwe mu mpamvu zatumye imibare y’abarembye kubera COVID-19 yiyongera ndetse n’abahitanwa na yo bakarushaho kuba benshi, ari uko hari abantu benshi bitiranyije ibimenyetso bya COVID-19 n’ibicurane bisanzwe, bigatuma babisuzugura bagatinda kujya kwivuza.

Umuvugizi wa Minisiteri y’Ubuzima, Julien Mahoro Niyingabira, yavuze ko kubera ko muri aya mezi hasanzwe n’ubundi hagaragara ibicurane bisanzwe (grippe), byatumye hari abagira ibimenyetso bya COVID-19 bakabisuzugura.

Yagize ati “Iki gihe ubusanzwe gikunze kubamo ibicurane bisanzwe, ibyo rero byatumye abenshi babisuzugura, bakamara igihe kinini batagiye kwa muganga kwisuzumisha kubera ko ibimenyetso bya COVID-19 byenda gusa neza n’iby’ibicurane bisanzwe bikunze kugaragara muri aya mezi.”

Yongeyeho ati “Kuba rero ari igihe gisanzwe kizwiho kubamo ibicurane bisanzwe bikaba byaratumye benshi bajya kwa muganga bakerewe, byatumye umubare w’abarwayi ba COVID-19 barembye cyane wiyongera, binatuma tugira umubare munini w’abitaba Imana.”

Niyingabira yavuze ko kuba harafashwe icyemezo cyo gushyira Umujyi wa Kigali muri Guma mu rugo, ari uko imibare y’abandura yari hejuru cyane kuko yari ikubye inshuro ebyiri imibare y’abandura ahasigaye hose mu gihugu.

Yongeyeho ko Umujyi wa Kigali wagombaga gushyirirwaho ingamba zihariye zigamije gukumira ko ubwandu bwarushaho gukwirakwira.

Ati “Mu Mujyi wa Kigali hashyizweho gahunda ya Guma mu rugo, abantu bakwiye kumva ko iyo dushyizeho Guma mu rugo cyangwa iyo tugabanyije ingendo z’abantu, bigira uruhare rukomeye kuko bituma abanduye badakwirakwiza ubwandu mu bandi.”

Umuyobozi Mukuru w’Ikigo cy’Igihugu gishinzwe Ubuzima (RBC), Dr Sabin Nsanzimana, aherutse gutangaza ko mu bipimo bimaze iminsi bifatwa byagaragaye ko abangana na 16% y’abapimwa baba baranduye COVID-19 bakarinda bayikira batabimenye, ariko bakaba bashobora kuba baranduje benshi muri icyo gihe bari barwaye.

Umuganga ukora cyane mu bikorwa byo gupima COVID-19, Igiraneza Deborah, yatanze ubutumwa bw’uko buri muntu wese akwiye kurushaho kwirinda kuko nta wamenya uwanduye cyangwa utaranduye.

Yagize ati “COVID-19 ntabwo iboneshwa ijisho, ntushobora kubona umuntu ngo umenye niba ayirwaye cyangwa atayirwaye, ni yo mpamvu ugomba kwirinda. Buri muntu wese ntabwo yapimwe, buri wese rero ashobora gusanga yaranduye kandi ntiwapfa kubimenya, ushobora no gusanga umwe mu bo mubana yaranduye, abantu rero bagomba kwirinda kuko ntuzi ukwegereye uko ahagaze.”

Imibare ya Minisiteri y’Ubuzima igaragaza ko icyiciro gikunze kugaragaramo umubare munini w’abandura, ari abari hagati y’imyaka 20 na 49, ahanini ngo kuko ari bo bantu bakunda kugenda cyane, baba bajya mu mirimo cyangwa ahandi.

Minisiteri y’Ubuzima iheruka gutangaza ko mu Rwanda nta mubare munini w’indembe kandi n’izihari zitabwaho zigakira zigataha. Muri icyo gihe mu Bitaro byo mu Gatenga na Nyarugenge bijyanwamo abarwayi bafite ibibazo bikomeye hasezerewe abantu 45.

Kugeza ubu mu Rwanda, imibare igaragaza ko kugeza ku wa 25 Mutarama 2021, abanduye COVID-19 bose bagera ku 13311, muri bo abakirwaye bakaba 4453, mu gihe abitabye Imana ari 177.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Inzego z’ubuzima zitangaza ko ubwiyongere bw’indembe za COVID-19 bufitanye isano n’umubare munini w’abitiranya ibicurane bisanzwe n’ibimenyetso by’iki cyorezo. Aba barwayi ni zimwe mu ndembe zirwariye mu Bitaro bya Nyarugenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .