Iby’ingenzi ukwiriye kumenya kuri coronavirus n’uko wayirinda

Yanditswe na Joy Monique Dukuze Umutesi
Kuya 14 Werurwe 2020 saa 03:52
Yasuwe :
0 0

Hari ibibazo bikomeza kwibazwa ku cyorezo cyimaze kugera ku migabane itandukanye y’Isi kuri ubu cyamaze kugaragara no mu Rwanda. Benshi bakomeje kugaragaza impungenge kubera ukuntu umubare w’abayirwaye ukomeje kwiyongera ku Isi.

Ubu bwoko bushya bwa coronavirus bwahawe izina rya Covid-19 buri mu bwoko bwa za virusi cyangwa udukoko duto cyane tutaboneshwa amaso, bita corona. Utu dukoko turandura cyane ariko ntidutinda mu mubiri w’umuntu.

Iyo tugeze mu muntu tujya mu mazuru, mu muhogo no mu bihaha tugatangira kuzahaza umubiri kimwe na virus isanzwe itera ibicurane.

Ibimenyetso bya Coronavirus n’uko yandura

Uwanduye iyi virusi agaragaza ibimenyetso bitandukanye birimo kugira umuriro, inkorora no gufungana mu myanya y’ubuhumekero.

Ibi bimenyetso bishobora kugaragara byibura hagati y’iminsi ibiri n’ibyumweru bibiri nyuma y’uko yanduye, ariko hari bamwe batinda kugaragaza ibi bimenyetso.

Uwafashwe n’iyi ndwara ashobora gukira mu gihe yitaweho yakuwe mu bandi

Kimwe na virus itera ibicurane bisanzwe, iva ku muntu uyirwaye mu matembabuzi yose ava mu gukorora, kwitsamura, kwikora mu maso, ku munwa no ku mazuru ikajya ku muntu utarayanduye muri ubwo buryo.

Yandurira kandi mu kwegerana cyane (nibura muri metero 1) n’uyifite cyangwa gukora ku bikoresho byakoreshejwe n’uyifite.

Iyi virusi irihuta cyane mu kwandura no kwiyongera ariko ingufu zayo mu kuzahaza umubiri kugeza ku rupfu rw’umuntu ziri hasi. Ku bantu bayandura ishobora kwica hagati ya 2% na 3% gusa byabo.

Ifata umuntu uwo ari we wese, umwana cyangwa umukuru

Nubwo umubare munini w’abagaraje ibimenyetso byayo ari abantu bakuze, abana nabo barayandura.

Umuntu uwo ari we wese afite amahirwe yo kwandura iki cyorezo n’ubwo abakuze (hejuru y’imyaka 60) bafite ibyago binshi byo kuba ari bo izahaza cyane cyane nk’abasanzwe bafite izindi ndwara karande.

Kimwe n’abandi, abana na bo bakwiye gufashwa gukurikiza ingamba zo kwirinda iki cyorezo, cyane nko gukaraba intoki kenshi.

Coronavirus ku bagore batwite

Ubushakashatsi bwagaragaje ko abana bavutse ku babyeyi banduye coronavirus kimwe n’abavuka batagejeje igihe bashobora kuvukana iyi ndwara ariko abakoze ubushakashatsi bavuga ko ibyavuye muri ubu bushakashatsi bitizewe neza.

Icyo wakora igihe uketse ko wanduye cyangwa uwo mubana yanduye

Mu gihe uwo mubana mu rugo cyangwa wowe ubwawe ugaragaje ibimenyetso bya coronavirus, ihutire guhamagara inzego z’ubuzima ndetse wishyire mu kato mu rwego rwo kutanduza abandi.

Irinde gukoresha ibikoresho bimwe n’uwagaragaje ibimenyetso bya coronavirus, nko gukoresha ubwogero bumwe, cyangwa kuryama ku buriri bumwe n’ibindi bikoresho bihura n’umubiri.

Inyamaswa n’andi matungo yo mu rugo ukwiye kwirinda kuyegera mu gihe wagaragaje ibimenyetso bya coronavirus. Kujya mu ruhame n’ahandi hahurira abantu benshi si byiza kubikora.

Ni byiza ko wabika ibiribwa n’imiti uzakenera mu gihe cy’iminsi byibura 30 mu rwego rwo kwirinda kujya ahahurira abantu benshi.

Coronavirus mu ndege

Uburyo umwuka wo mu ndege utembera, birashoboka ko abayirimo batakwandura iyi ndwara kuko uyu mwuka uba uyunguruye cyane nko mu ndege zitwara abantu aho umwuka uri hagati y’icumi na 50% ubanza guca mu tuyunguruzo byibura hagati y’inshuro 20 na 30 mu isaha imwe.

Ibi bituma amahirwe yo gukwirakwiza umwuka wanduye cyangwa urimo udukoko agabanuka.

Iyi virus imara igihe kingana gite ku bintu yagezeho?

Hagati y’amasaha umunani n’icumi ku hantu horohereye nko ku giti kidatunganyije, iponji (eponge), igikarito, n’amasaha arenzeho kuri ayo ku hantu hakomeye nko ku kirahuri, pulastike, icyuma, urubaho n’ibindi.

Icyo wakora kugira ngo wirinde iyi ndwara

Nk’uko byakomeje kugarukwaho, ni ngombwa gukaraba intoki inshuro nyinshi n’isabune n’amazi meza, cyangwa ugakoresha imiti yabugenewe ikura udukoko mu ntoki. Hari kandi gukoresha agatambaro gasukuye igihe witsamuye, ariko nanone abaganga basaba ko abantu bakwipfuka ku munwa hakoreshejwe udukoresho twabugenewe no kwirinda kuramukanya mu ntoki.

Ku rwego mpuzamahanga iki cyorezo kimaze gufata abantu 132.000 barimo 81.021 bo mu Bushinwa na 51.000 hanze yabwo. Abamaze guhitanwa nacyo bageze mu 5000 ku Isi.

Covid-19 buri mu bwoko bwa za virusi cyangwa udukoko duto cyane tutaboneshwa amaso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .