Iby’ingenzi kuri Favipiravir, umuti u Rwanda ruteganya kwifashisha mu guhangana na COVID-19

Yanditswe na Dufitumukiza Salathiel
Kuya 19 Mutarama 2021 saa 02:59
Yasuwe :
0 0

Minisiteri y’Ubuzima yatangaje ko kuwa 20 Mutarama 2021 u Rwanda ruzakira umuti mushya ufasha guhangana na Coronavirus, uzwi nka Favipiravir uri mu bwoko bw’ibinini bya mg 200.

Ni umuti wagiye wifashishwa cyane no mu bindi bihugu birimo n’u Bushinwa aho icyo cyorezo cyatangiriye ndetse n’u Buhinde buri mu bihugu bifite ubwandu bwinshi ku Isi bwitabaje uwo muti.

Mu mezi atandatu ya mbere hagaragaye icyorezo cya COVID-19 giterwa n’agakoko gashya ka Coronavirus, ubwo abarenga miliyoni 16 bari bamaze kucyandura mu Isi yose, nibwo byagaragaye ko ibintu byahinduye isura maze abashakashatsi batandukanye batangira ubuvumbuzi.

Byari bigoye kuvuga ko bari butuze bagakora umuti kabuhariwe wo guhangana n’icyo cyorezo batari banafiteho amakuru yimbitse, kandi gifite umuvuduko udasanzwe mu gukwirakwira Isi yose.

Icyo bakoze, batangiye kugerageza imwe mu miti isanzwe ivurishwa indwara zandura, by’umwihariko izigira ibimenyetso birimo ibicurane, ngo barebe ko hari icyo bitanga kuko umurwayi wa Coronavirus na we akenshi aba aribwa umutwe ndetse afite ibicurane.

Umuti wa Favipiravir ni umwe mu miti yari isanzwe izwiho guhashya ibicurani cyane, wakozwe n’Ikigo cy’Abayapani, Fujifilm Group mu 2014. Mu 2016 cyaje gutanga uburenganzira bwo gukora uwo muti ku Kigo cy’Abashinwa, Zhejiang Hisun Pharmaceutical co.

Mu gihe abashakashatsi bari bakiri mu rujijo bibaza icyakorwa ngo hagabanywe umuvuduko icyorezo gifite, ni bwo u Bushinwa bwawitabaje butangira kuwukoresha mu Mujyi wa Wuhan wagaragayemo Coronavirus bwa mbere, ndetse bitanga umusaruro ufatika.

Nyuma y’aho n’ibindi bihugu birimo u Butaliyani bwabaye igihugu cyugarijwe mu Burayi mu icyo gihe bwarawukoresheje, u Buhinde, u Burusiya, Leta Zunze Ubumwe z’Abarabu n’ibindi byinshi hirya no hino mu Isi byarawiyambaje kuko watanze umusaruro ufatika.

Hakozwe ubushakashatsi butandukanye bwerekanye ko uwo muti ushobora kuvura Coronavirus, maze n’abatari bakawukoresheje batangira kuwutumiza.

Mu mikorere yawo, umuti wa Favipiravir iyo umurwayi awunyoye ugera mu mubiri ugakora nk’aho ari ubudahangarwa umubiri usanganwe. Ugira umuvuduko mu gukora vuba ku kigero cya 94%, ndetse ukunganira abasirikare b’umubiri ku kigero cya 54%.

Abashakashatsi berekana ko ku murwayi uwunyoyeho bwa mbere utangira gukora nyuma y’amasaha abiri, naho kugira ngo umuvure byuzuye bigasaba ko aba amaze kunywa dose zawo nyinshi.

Nubwo nta gipimo cy’ingano ya dose z’uwo muti kirahurizwaho ko ari zo umurwayi wa COVID-19 agomba kunywa kugira ngo ayikire, ahenshi umurwayi ahabwa ibinini bingana na miligarama (mg) 1800 ku munsi wa mbere, ubundi akazajya ahabwa garama 800 buri munsi mu gihe kiri hagati y’iminsi 12 na 14.

Ubushakashatsi bwakozwe n’Abayapani bwagaragaje ko hari ingaruka mbi umuti wa Favipiravir wagize kuri 20% by’abarwayi bawunyoye (ku gipimo gito cy’uwari ugenewe kuvura COVID-19).

Izo ngaruka zirimo indwara yo mu maraso (hyperuricemia) n’impiswi byagaragaye ku bangana na 5% mu bakoreweho inyigo, ndetse n’igabanyuka rya bamwe mu basirikare b’umubiri.

Imwe mu nyigo zakozwe kandi igaragaza ko hari ubwo umuti wa Favipiravir ushobora gutuma umuntu agira ibibazo by’imitekerereze birimo kwigunga, gucika intege, umunaniro, gusinzira bigoranye, kugira ubwoba bwinshi no guhora wishinja ikosa, kudatuza mu ntekerezo no kugira akababaro cyangwa ukumva uciriritse.

Nubwo hari ingaruka z’igihe gito, muri rusange hagaragazwa ko umuti wa Favipiravir ari mwiza ndetse ugira umumaro igihe ukoreshejwe neza.

Icyakora abagore bari mu gihe cy’uburumbuke bihanangirizwa ko badakwiye kuwukoresha. Ibigo biwukora nabyo bisabwa gushyira amabwiriza n’ubutumwa bwo kuburira abantu ku bifuniko byawo, ndetse bikabasobanurira neza imikoreshereze yawo n’uko ukwiye gufatwa.

Abagore bakiri mu myaka ibemerera kubyara [bataracura] bagiye guhabwa Favipiravir, ni ngombwa ko babanza gusuzumwa ko badatwite hakoreshejwe udupimo twabugenewe twifashisha inkari.

U Rwanda rugiye kwitabaza Favipiravir mu gihe ubwandu n’impfu bya COVID-19 bikomeje kwiyongera bidasanzwe, aho kugeza ubu abamaze kugaragaraho abamaze kwandura ari 11.259 mu bipimo 799.817 byafashwe kuva icyo cyorezo cyagera mu gihugu ku wa 14 Werurwe 2020.

Muri bo, 7.412 barayikize, 3.701 baracyarwaye naho 146 bahitanwe na COVID-19.

U Rwanda rurateganya gukoresha umuti wa Favipiravir wifashishwa n'ibihugu byinshi mu Isi mu guhangana na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .