Covid-19: Urukingo rwa Johnson & Johnson rwahagaritswe by’agateganyo mu bihugu bimwe

Yanditswe na Mutangana Gaspard
Kuya 14 Mata 2021 saa 06:05
Yasuwe :
0 0

Inzego z’Ubuzima muri Leta Zunze Ubumwe za Amerika, Afurika y’Epfo no mu Muryango w’Ubumwe bw’u Burayi, zahagaritse itangwa ry’urukingo rwa Covid-19 rwakozwe n’uruganda rwa Johnson & Johnson, bitewe n’ikibazo cyo kuvura kw’amaraso cyagaragaye ku bantu baruhawe.

Abantu basaga miliyoni 6,8 bamaze guhabwa urukingo rwa Johnson & Johnson. Batandatu muri bo, bagaragayeho ikibazo cyo kuvura kw’amaraso, nyuma yo gukingirwa. Umwe yarapfuye, na ho undi ararembye.”

Abagaragaweho icyo kibazo ni abagore batandatu, bafite imyaka iri hagati ya 18 na 48. Abandi bahawe uru rukingo basabwe ko mu gihe bagize ibimenyetso birimo kubabara umutwe, kuribwa mu maguru n’ibindi bidasanzwe, bakwiye kwihutira kujya kwa muganga.

Bivugwa uru rukingo rwari rumaze amezi abiri gusa rwemejwe, rutazamara igihe kinini rutarongera kubona uburenganzira bwo gutangwa, kuko ibyago byo kwicwa na Covid-19 biruta kure ibyo kugira ikibazo cyo kuvura kw’amaraso.

Afurika y’Epfo nayo yamaze guhagarika urwo rukingo, kugira ngo iperereza ribanze rikorwe neza.

Tariki ya 12 Werurwe nibwo Ishami ry’Umuryango w’Abibumbye ryita ku Buzima, OMS, ryashyize urukingo rwa Johnson & Johnson mu nkingo zishobora gukoreshwa ku Isi hose.

Uru rukingo rufite umwihariko wo guterwa inshuro imwe, rukabikwa ahantu hari ubukonje busanzwe, rugahenduka kandi rukagira ubushobozi bwo guhangana n’ubwoko bwa Covid-19 bwagaragaye bwa mbere muri Afurika y’Epfo.

Urukingo rwa Johnson & Johnson rwahagaritswe muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .