COVID-19 ku wa 8 Gicurasi: Abanduye ku Isi bari hafi kugera kuri miliyoni enye

Yanditswe na Habimana James
Kuya 8 Gicurasi 2020 saa 09:20
Yasuwe :
0 0

Ishami ry’Umuryango w’Abibumbye ryita ku buzima, OMS, ryatangaje ko Isi ikomeje kugarizwa mu buryo bukomeye n’icyorezo cya Coronavirus, kuko ubu imibare y’abanduye yageze kuri 3 917 991, naho 270 740 bamaze gupfa.

Imibare ya OMS igaragaza ko kuri uyu wa Kane tariki 7 Gicurasi, abantu 97 254 aribo banduye Coronavirus, naho 5 646 nibo bapfuye.

Leta Zunze Ubumwe za Amerika zongeye kugira umubare w’abantu benshi bishwe na Coronavirus, kuko kuri uyu wa 7 Gicurasi igihugu cyapfushije abantu 2 129, ibi byatumye abamaze gupfa muri iki gihugu bagera ku 76 938 mu gihe abandi 1 292 850 bamaze kwandura.

Ku mugabane w’u Burayi, u Bwongereza bukomeje kuza imbere mu kugira abamaze gupfa benshi kuko ubu bageze ku 30 615.

Nubwo Minisitiri w’Intebe w’iki gihugu, Boris Johnson, biteganyijwe ko azageza ijambo ku baturage ku Cyumweru, amakuru ava mu biro bye aravuga ko hashobora kuzakazwa ingamba zo kwirinda ku buryo zizageza muri Kamena uyu mwaka.

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa ku Isi, Espagne iza ku mwanya wa kabiri mu banduye kuko ari abantu 256 855, hamaze gupfa 26 070, mu Butaliyani handuye 215 858 hamaze gupfa 29 958, mu Bwongereza handuye 206 715, hamaze gupfa 30 615.

Igihugu cy’u Burusiya cyaje mu bihugu bimaze kugira abanduye benshi kuko ubu gifite abagera ku 177 160, abamaze gupfa ni 1 625, mu Bufaransa handuye 174 791, hamaze gupfa 25 987.

Ku mugabane wa Afurika wose hamaze kugaragara abantu 55 364 banduye Coronavirus, abamaze gupfa basaga 2 083 naho abakize ni 19 118.

Afurika y’Epfo iri imbere mu kugira abafite ubwandu bwinshi kuko ari 8 232, abamaze gupfa ni 161, ikurikirwa na Misiri ifite abanduye ibihumbi 7 981 naho abapfuye ni 482.

Algeria ni cyo gihugu gifite abamaze gupfa benshi kuri uyu mugabane kuko ari 483 mu gihe abanduye ari 5 182

Muri Afurika y’Iburasirazuba, igihugu cya Tanzania kimaze iminsi umunani kitagaragaza imibare y’abanduye cyangwa bishwe na Coronavirus, ni nyuma y’aho Perezida John Pombe Magufuli atangarije ko laboratwari y’igihugu yatangaga amakuru y’ibinyoma kuri iki cyorezo.

Kugeza ubu igihugu kiza imbere mu bwandu bwinshi ni Kenya kuko hamaze kwandura 607 hapfuye 29, Tanzania iraza ku mwanya wa kabiri, kuko handuye 480 hapfuye 16, u Rwanda rufite abanduye 271 abamaze gukira ni 133, muri Uganda ho hamaze kwandura 101, mu Burundi handuye abantu 15 hapfa umwe naho muri Sudani y’Epfo hamaze kwandura abantu 74.

Abanduye ku Isi bari hafi kugera kuri miliyoni enye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .