Coronavirus ku wa 9 Mata: Abantu 1881 nibo bapfuye ku munsi umwe muri Amerika

Yanditswe na Habimana James
Kuya 9 Mata 2020 saa 09:51
Yasuwe :
0 0

Leta Zunze Ubumwe za Amerika nicyo gihugu cyongeye kwibasirwa cyane na Coronavirus kurusha ibindi kuko mu masaha 24 yapfushije abantu 1881.

Mu gitondo cyo kuri uyu wa Kane tariki ya 09 Mata 2020, imibare y’ubwandu bushya n’abahitanywe n’iki cyorezo yakomeje kuzamuka hirya no hino ku Isi ndetse ubu Leta Zunze Ubumwe za Amerika, zongeye guca agahigo ko gupfusha abantu benshi ku munsi umwe.

Inzego z’Ubuzima muri iki gihugu zitangaza ko abantu bose bamaze gupfa ari 14831 kandi imibare iri bukomeze kwiyongera umunsi ku munsi.

Kugeza ubu abantu 435553 nibo bamaze kwandura Coronavirus muri Leta Zunze Ubumwe za Amerika.

Mu Bushinwa aho iki cyorezo cyatangiriye mu Mujyi wa Wuhan, abaturage bavanywe mu kato bari bamazemo ibyumweru 11, ariko basabwa kutava mu ngo babe bajya hirya no hino mu gihugu mu gihe iki cyorezo kitarahashywa burundu.

Umuyobozi wungirije w’Intara ya Hubei, Cao Guangjin, yagize ati “Tuzi neza ko tutagomba kwirara mu gihe tutaragera ku ntsinzi ya nyuma.”

Abaturage muri uyu mujyi kandi bagaragaye bambaye udupfukamunwa mu kwirinda ko bakongera kwandura.

Mu Bwongereza, Minisitiri w’Intebe, Boris Johnson, yongeye kumara umunsi wa gatatu ari mu nzu y’indembe nyuma yo gushyirwamo kuwa kabiri.

Imibare yo muri iki gitondo saa 08:45, iragaragaza ko ku Isi hose abamaze kwandura Coronavirus ari 1519213, abitabye Imana bo ni 88531 mu gihe abamaze gukira ari 330877.

Kugeza ubu Leta Zunze Ubumwe za Amerika, Espagne, u Butaliyani, u Budage n’u Bufaransa ni byo bihugu bikomeje kuza imbere mu kugira abanduye benshi ndetse n’amaze gupfa.

Espagne ifite abantu 148220 bamaze kwandura mu gihe abapfuye ari 14792 naho abakize bakaba 48021. U Butaliyani bwo abamaze kwandura ni 139422 mu gihe abapfuye ari 17669, abakize bakaba 26491.

U Bufaransa bumaze kugira abantu 83080 banduye, 10887 bapfuye na 21461 bakize. Mu Budage abamaze kwandura ni 113296, abapfuye ni 2349 mu gihe abakize ari 46300.

Ku mugabane wa Afurika, ibihugu 52 kuri 54 nibyo ubu bwandu bumaze kugeramo, abantu 11400 bamaze kwandura, 574 bamaze gupfa mu gihe abandi 1405 bamaze gukira.

Algeria niyo ifite abantu benshi bapfuye aho bamaze kuba 205, mu gihe Afurika y’Epfo ariyo ifite ubwandu bwinshi 1845 n’abantu 18 bamaze gupfa.

Mu muryango wa Afurika y’i Burasirazuba, u Rwanda rufite abarwayi 110, barindwi bamaze gukira, Kenya ifite abarwayi 179, batandatu bamaze gupfa naho icyenda barakize, Uganda ifite abarwayi 53, u Burundi batatu, Tanzania ifite 25 umwe yarapfuye naho Sudani y’Epfo yo ifite abarwayi babiri.

Ushobora kubona amakuru yose ajyanye na Coronavirus unyuze kuri IGIHE

Imibare y'abazira Coronavirus muri Leta Zunze Ubumwe za Amerika ikomeje gutumbagira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .