Coronavirus ku wa 7 Mata: Inzu zishyirwamo imirambo i New York zuzuye

Yanditswe na Nkurunziza Ferdinand
Kuya 7 Mata 2020 saa 09:09
Yasuwe :
0 0

Leta Zunze Ubumwe za Amerika zikomeje kuza imbere mu bihugu biri kwibasirwa cyane na Coronavirus. Mu gitondo cyo kuri uyu wa kabiri, tariki ya 07 Mata 2020, imibare y’ubwandu bushya n’abahitanywe n’iki cyorezo yakomeje kuzamuka ndetse ubu inzu z’uburuhukiro zo mu Mujyi wa New York no mu bindi bice bitandukanye zatangiye kuzura kubera impfu nyinshi.

Abayobozi muri Leta Zunze Ubumwe za Amerika batangaje ko muri iki Cyumweru imibare y’abandura n’abapfa izakomeza kuzamuka cyane ndetse ko zimwe muri leta zo muri iki gihugu ziri kwitabaza za stade n’izindi nyubako nini zikazihindura ibitaro bishobora kwifashishwa mu kwita ku barwayi bashya.

Mu gihugu cy’u Bushinwa aho iki cyorezo cyatangiriye, kuri uyu wa mbere bwije nta muntu n’umwe uhitanywe na Coronavirus kandi n’ubwandu bushya bwagaragaye ni ubw’abantu baturutse hanze.

Mu gihugu cya Nouvelle-Zéalande ho uwari Minisitiri w’Ubuzima yegujwe ndetse aniyita ubwe ‘Igicucu’ nyuma yo kunyuranya n’amabwiriza yo kwirinda ikwirakwira rya Coronavirus igihugu cye cyashyizeho, akajyana umuryango we kwinezeza ku mucanga.

Mu Buyapani ho uyu munsi haratangizwa ibihe bidasanzwe bishobora kumara amezi atandatu nyuma y’aho kuri uyu wa mbere habontse abandi barwayi bashya 252. Abaganga bo muri iki gihugu bavuga ko nta bikoresho bihagije byo gupima bafite ndetse ko gutangiza ibihe bidasanzwe bishobora kuba bigiye gukorwa igihe cyararenze.

Imibare yo muri iki gitondo saa 08:45 igaragaza ko ku Isi hose abamaze kwandura ari 1 348 184, abitabye Imana kubera Coronavirus bo ni 74 816, mu gihe abamaze gukira bo ari 284 802.

Leta Zunze Ubumwe za Amerika, Espagne, u Butaliyani, u Budage n’u Bufaransa ni byo bihugu biri kuza imbere mu kugira abanduye benshi kandi byihariye abarenga ½ cy’abanduye ku isi hose.

Leta Zunze Ubumwe za Amerika zikomeje kuza imbere mu bihugu biri kwibasirwa cyane na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .