Imibare iragaragaza ko no ku wa Gatandatu iki gihugu cyari cyapfushije abantu 415, ibintu ngo bigaragaza ko barimo kugitsinda.
Muri Werurwe uyu mwaka u Butaliyani nicyo gihugu cyari cyugarijwe cyane na Coronavirus kurenza ahandi ku Isi kuko byari bigeze aho abantu barenga igihumbi bapfa ku munsi umwe.
Ku rwego rw’Isi imibare y’abanduye Coronavirus ni 2 995 209 mu gihe abamaze guhitanwa n’iki cyorezo ari ibihumbi 207 009.
Leta Zunze Ubumwe za Amerika nizo zikomeje kugira abantu benshi banduye kuko ubu 987 322 mu gihe hapfuye 55 415.
Mu gihugu cy’u Bwongereza, Minisitiri w’Intebe Boris Johnson yagarutse mu kazi, nyuma y’igihe arembejwe n’icyorezo cya Coronavirus.
Amakuru avuga ko kuri uyu wa mbere, Boris ari buyobore inama yiga uko iki gihugu kirimo guhangana na Coronavirus.
Kugeza ubu Leta Zunze Ubumwe za Amerika nizo zikomeje kuza imbere mu bimaze kugira umubare w’abanduye n’abishwe na Coronavirus ku Isi, Espagne iraza ku mwanya wa kabiri kuko handuye abantu 226 629 hamaze gupfa 23 190, mu Butaliyani handuye 197 675 hamaze gupfa 26 644, mu Bufaransa handuye 162 100 hamaze gupfa 22 856.
Mu Budage handuye abantu 157 770 hapfuye 5 976, naho mu Bwongereza handuye abantu 152 840 abamaze gupfa ni 20 732.
Ku Mugabane wa Afurika wose hamaze kugaragara abantu 32 657 banduye Coronavirus, abamaze gupfa ni abantu 1 427 naho abakize ni 10 018.
Afurika y’Epfo nicyo gihugu kimaze kugira abafite ubwandu bwinshi kuko ari 4 546 abamaze gupfa ni 87, ikurikirwa na Misiri ifite abanduye 4 534 naho abapfuye ni 317.
Algeria nicyo gihugu gifite abamaze gupfa benshi kuri uyu mugabane bangana na 425, mu gihe abanduye ari 3 382.
Muri Afurika y’Iburasirazuba igihugu kiza imbere mu bwandu bwinshi ni Kenya handuye 355 hapfuye 14, mu Rwanda handuye 191 nta n’umwe urapfa mu gihe abamaze gukira ari 92, muri Tanzania handuye 299 hamaze gupfa abantu 10, muri Uganda ho hamaze kwandura 79, mu Burundi handuye abantu 11 hapfa 1 naho muri Sudani y’Epfo hamaze kwandura abantu batandatu.
TANGA IGITEKEREZO