Bwa mbere mu Rwanda, abantu benshi bakize Coronavirus mu munsi umwe

Yanditswe na Ishimwe Israel
Kuya 27 Nyakanga 2020 saa 10:30
Yasuwe :
0 0

Abantu 58 barimo 55 b’i Kigali basanganywe Coronavirus mu Rwanda kuri uyu wa Mbere mu gihe abayikize ari 57, umubare munini w’abasezerewe mu bitaro mu munsi umwe.

Minisiteri y’Ubuzima yatangaje ko mu barwayi bashya 58 bagaragaweho Coronavirus kuri uyu wa Mbere, harimo 55 bo mu Mujyi wa Kigali bapimwe mu midugudu iri mu kato, babiri bo mu Karere ka Rusizi n’umwe wo mu ka Musanze.

Abarwayi bashya 58 bagaragaye mu bipimo 6165 byafashwe bituma umubare w’abamaze kwandura iki cyorezo mu Rwanda uba 1879. Abamaze gukira ni 975 barimo 57 basezerewe mu bitaro uyu munsi mu gihe abakirwaye ari 899. Batanu nibo bamaze guhitanwa n’iki cyorezo.

Kuva umurwayi wa mbere wa Coronavirus agaragaye mu Rwanda ku wa 14 Werurwe 2020, nibwo bwa mbere habonetse umubare munini w’abantu bakize mu munsi umwe.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 16 597 238 bamaze kuyandura ku Isi yose, barimo 655 119 yahitanye mu gihe 10 137 818 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .