Bwa mbere mu Rwanda abantu 9 bishwe na Coronavirus mu munsi umwe, abayanduye ni 310

Yanditswe na Ishimwe Israel
Kuya 21 Mutarama 2021 saa 11:34
Yasuwe :
0 0

Ku nshuro ya mbere mu Rwanda habonetse abantu icyenda bishwe na Coronavirus mu munsi umwe mu gihe abayanduye biyongereyeho 310 mu masaha 24 ashize.

Minisiteri y’Ubuzima ku wa tariki 21 Mutarama 2021 yatangaje ko abantu icyenda bahitanywe na Coronavirus, 310 bayanduye mu gihe abayikize biyongereyeho 161.

Mu bahitanywe na Coronavirus harimo abagore bane b’imyaka 80 (i Karongi), aba 61, 43 na 32 b’i Kigali n’abagabo batanu b’imyaka 86 (i Huye) n’abafite imyaka 75, 73, 72 bo muri Kigali ndetse n’ufite 58 wo muri Rubavu.

Abantu icyenda bapfuye kuri uyu wa Kane batumye umubare w’abamaze guhitanwa n’iki cyorezo kuva cyagera mu Rwanda muri Werurwe 2020 bagera ku 162.

Ni ku nshuro ya mbere mu Rwanda habonetse umubare munini w’abahitanwe na Coronavirus mu munsi umwe kuko abenshi baherukaga kuboneka ari barindwi batangajwe ku wa 30 Ukuboza 2020.

Minisiteri y’ubuzima yatangaje ko abarwayi bashya banduye ari 310 mu bipimo 4359 byafashwe, bituma umubare w’abamaze kwandura bose mu gihugu ungana na 12 170. Abakize ni 161, bikaba byatumye umubare w’abamaze gukira bose uba 7973 mu gihe abakirwaye ari 4035.

Abarwayi bashya babonetse muri “Kigali:85, Gatsibo: 57, Ngoma: 41, Gicumbi: 27, Huye: 18, Rulindo: 11, Karongi: 11, Musanze: 10, Nyagatare: 9, Gisagara: 7, Nyanza: 6, Kirehe: 6. Burera: 5, Rubavu : 5, Muhanga: 3, Rusizi: 2, Kamonyi: 2, Nyamagabe: 2, Ruhango: 2, Nyamasheke: 1.”

Mu gihe ubwiyongere bw’abandura n’abahitanwa na Coronavirus buzamuka, ubu amaso ahanzwe urukingo ndetse hari icyizere ko rushobora kuboneka vuba.

Umuyobozi w’Ikigo cy’Igihugu gishinzwe Ubuzima (RBC), Dr. Sabin Nsanzimana, yavuze ko u Rwanda rwiteguye kwakira inkingo no kuzitanga.

U Rwanda rwasabye inkingo mu bigo bitandukanye kuko rwiteguye kwakira nyinshi zemejwe n’Ishami ry’Umuryango w’Abibumbye ryita ku Buzima (OMS) nk’izishobora kwifashishwa.

Dr Nsanzimana yavuze ko u Rwanda rwasabye inkingo rukeneye kandi ko niziboneka igihugu cyiteguye guhita gitangira kuzitanga ku bazazigenerwa.

Yagize ati “Twasabye dose miliyoni zakoreshwa mu buryo bwihuse, turategereje kandi vuba, twizera ko bitarenze Gashyantare cyangwa mbere yaho, dushobora kuba twatangiye icyiciro cya mbere cyo gukingira.’’

U Rwanda rufite gahunda yo gukingira abaturage mu gihe cy’imyaka ibiri; aho ruzakoresha miliyoni 124$, akabakaba miliyari 122 Frw kugira ngo abagera kuri 60% bahabwe u

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .