Minisiteri y’Ubuzima yatangaje ko abarwayi bashya [964] basanzwe mu bipimo 8.741. Kuva muri Werurwe 2020 hamaze gufatwa ibipimo 1.573.227.

Itangazo rya Minisante ryo kuri uyu wa Gatatu ryerekanye ko abarwayi bashya biganje mu Mujyi wa Kigali wabonetsemo 326, Kamonyi [85], Musanze [78], Rubavu [73], Burera [47], Nyanza [38], Gakenke [32], Ruulindo [30], Rwamagana [27], Nyamasheke [23], Rutsiro [22]. Akarere ka Gisagara ni ko rukumbi katabonetsemo umurwayi.

Ni ubwa mbere habonetse abarwayi benshi ba COVID-19 mu munsi umwe kuko umubare munini wabonetse ku wa 22 Kamena 2021, wari 861. Bivuze ko mu minsi ibiri gusa abantu 1825 banduye iki cyorezo.

Kuri uyu munsi kandi abantu batanu barimo ‘abagabo batatu b’imyaka 70, 65, 63, umugore w’imyaka 43 (i Kigali) n’umugabo w’imyaka 68 (i Huye) bishwe na COVID-19’.

Abarwayi bakize mu masaha 24 bo biyongereyeho 22 bituma abamaze gukira baba 26.734. Abakiri kwitabwaho ni 6.129 barimo 12 barembye. Abagera ku 391.058 ni bo bahawe urukingo.

Abaturarwanda barasabwa gukomeza kubahiriza amabwiriza atangwa n’inzego z’ubuzima mu gukumira ikwirakwira ry’icyorezo, arimo kwambara agapfukamunwa neza, guhana intera,gukaraba intoki kenshi cyangwa gukoresha umuti wica udukoko igihe cyose wakoze aho abandi bakoze. Barasabwa kwirinda kwikorakora mu maso, ku izuru no ku munwa, ndetse bakishyurana bakoresheje ikoranabuhanga aho bishoboka hose.

23.06.2021 Amakuru Mashya | Update

Abantu 247,666 bamaze guhabwa doze ya kabiri y'urukingo rwa #COVID19 (AstraZeneca) barimo 264 bayihawe uyu munsi pic.twitter.com/yv0hpr7o3b

— Ministry of Health | Rwanda (@RwandaHealth) June 23, 2021