Batandatu bishwe na Coronavirus, bwa mbere abantu benshi barayikira mu munsi umwe

Yanditswe na Ishimwe Israel
Kuya 31 Ukuboza 2020 saa 10:50
Yasuwe :
0 0

Minisiteri y’Ubuzima yatangaje ko abantu batandatu bishwe na Coronavirus mu Rwanda mu gihe umubare w’abayikize wiyongereyeho 173, biba ubwa mbere hakize benshi mu munsi umwe.

Itangazo rya Minisante ryerekanye ko abarwayi bitabye Imana kuri uyu wa Kane bose ari abo mu Mujyi wa Kigali barimo abagore babiri b’imyaka 38 na 40 n’abagabo bane b’imyaka 52, 57, 62 na 71.

Umubare w’abitabye Imana watumye abamaze guhitanwa n’iki cyorezo ugera kuri 92 mu Rwanda.

Ku nshuro ya mbere kandi mu Rwanda abarwayi 173 bakize COVID-19, uba umubare munini w’abasezerewe mu bitaro mu munsi umwe kuva iki cyorezo giterwa n’agakoko ka Coronavirus kigeze mu gihugu.

Umubare munini u Rwanda rwaherukaga kubona w’abakize Coronavirus ni 95, abo basezerewe ku wa 31 Kanama 2020 nyuma yo gusuzumwa bagasangwa nta bwandu bwa virusi bagifite mu mibiri yabo.

Minisiteri y’Ubuzima yatangaje ko abantu 133 basanzwemo Coronavirus mu bipimo 4332 byafashwe mu masaha 24 yashize.

Bakuwe ahantu hatandukanye harimo muri “Kigali: 97, Musanze: 24, Rubavu: 6, Huye: 3, Muhanga: 2 na Kamonyi: 1.’’

Kuva umurwayi wa mbere wa COVID-19 agaragaye mu Rwanda ku wa 14 Werurwe 2020, hamaze gufatwa ibipimo 730 136, byasanzwemo abarwayi 8383, abasezerewe ni 6542 mu gihe abakiri kwa muganga ni 1749.

Minisante itangaza ko ijanisha ku bapfa rihagaze kuri 1.1%, mu gihe iry’abandura ari 3.1%.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .