Mu barwayi 39 ba Covid-19 barembye cyane mu Rwanda, harimo abakenera litilo icumi z’umwuka buri munota

Yanditswe na Muhonzire Sylvine
Kuya 5 Mutarama 2021 saa 09:04
Yasuwe :
0 0

Minisiteri y’Ubuzima yatangaje ko kugeza ubu mu Rwanda hari abarwayi 39 ba Coronavirus barembye, barimo batandatu barembye cyane bakenera umwuka ugera kuri litilo icumi ku munota ngo babashe guhumeka.

Ubwiyongere bukabije bw’ubwandu bwa Coronavirus buri kugaragara muri iyi minsi, ni ikibazo gihangayikishije cyane, aho buri kujyana no kwiyongera k’umubare w’abahitanwa nayo dore ko abamaze kubura ubuzima kubera iyi virus barenze 100, ndetse 50% muri bo, bapfuye mu kwezi kumwe.

Umuvugizi wa Minisiteri y’Ubuzima, Julien Mahoro Niyingabira yabwiye IGIHE ko ubu bwiyongere buri guterwa no kudohoka gukabije kw’abantu badakurikiza amabwiriza ya Covid-19 ndetse n’abantu bagaragaweho ibimenyetso bagatinda kujya kwa muganga bakaza kwivuza barembye, bikaba byabaviramo n’urupfu.

Ati “Ikibazo gikomeye ni abadohoka n’abumva ko Covid-19 itari hafi yabo ku buryo bandura ntibabimenye, ntibajye kwa muganga bagakomeza kubaho nk’uko bisanzwe, bagakomeza gukwirakwiza ubwandu.”

Yavuze ko gutinda kwivuza kw’abantu bagaragaweho ibimenyetso bakajya kwa muganga barembye, nabyo biri mu biteza ubu bwiyongere bw’abahitanwa n’iki cyorezo.

Yagize ati “Ubwiyongere buri kubonerwa cyane cyane mu kuba abantu bari gutinda kwivuza[…]bakaza barembye rimwe na rimwe ugasanga ni bo bashyize ku mwuka, ubundi ugasanga nibo bagize ibibazo bikaba byabaviramo no gupfa.”

Niyingabira yavuze ko kugeza ubu hari abarwayi 39 barembye bari kongererwa umwuka, 30 muri bo bari ku rugero rusanzwe rwo kongererwamo umwuka, mu gihe batandatu muri bo bari ku rwego rwo hejuru, aho bakenera umwuka mwinshi urenze litiro icumi ku munota, abandi batatu bo barembye bikabije.

Ibi biragagaza urugero n’ubukana bukabije iyi ndwara iriho ndetse ko buri wese akwiye kubigira ibye, ntihagire uwirara ngo akerense amabwiriza yo kwirinda iki cyorezo.

Ubu ibigonderabuzima bya leta ndetse n’amavuriro yigenga byemerewe hirya no hino mu gihugu gupima umuntu ufite ibimenyetso bya Covid-19 ibisubizo bikaboneka mu minota itarenze 15. Abakora ingendo zo mu mahanga nibo bonyine batemerewe gukoresha ubu buryo.

Niyingabira yavuze ko mu gihe umuntu yibonyeho ibimenyetso nk’ibya Covid-19 birimo ibicurane akwiriye gutekereza ko ari Covid-19 arwaye mbere y’uko atekereza ko ari ibicurane maze akihutira kujya kwipimisha.

Kugeza ubu 31% by’abamaze kwandura coronavirus bose, bayanduye mu kwezi gushize.

Mu Rwanda hamaze gufatwa ibipimo bya Coronavirus 741 036, hasanzwemo abantu 8021 banduye. Muri bo 6816 basezerewe mu bitaro nyuma yo gupimwa bagasanga nta bwandu bagifite mu gihe 1927 bakiri kwitabwaho. Abantu 105 nibo bamaze guhitanwa n’iki cyorezo.

Minisante yatangaje ko kugeza ubu hari abarwayi 39 ba Civid-19 barembye. Kimwe mu bituma abantu baremba ni ugutinda kujya kwa muganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .