Abantu batatu bishwe na Coronavirus, abayanduye mu Rwanda biyongereyeho 273

Yanditswe na Akayezu Jean de Dieu
Kuya 23 Mutarama 2021 saa 12:12
Yasuwe :
0 0

Minisiteri y’Ubuzima mu Rwanda yatangaje ko mu masaha 24 ashize abantu batatu bishwe na Coronavirus bituma umubare w’abo imaze guhitana ugera ku 165, mu gihe mu bipimo 4,857 byafashwe uyu munsi , abantu 273 basanganywe iki cyorezo.

Itangazo rya Minisante ryo kuri uyu wa Gatanu tariki 22 Mutarama 2021, rigaragaza ko abantu bakize biyongereyeho 211 bituma umubare w’abamaze gukira iki cyorezo ugera ku 8184.

Muri rusange mu barwayi babonetse uyu munsi abakuwe i Kigali nibo benshi dore ko ari 116, mu gihe mu Karere ka Gatsibo habonetse abarwayi bashya ba Coronavirus 57.

Mu tundi turere twa Rwamagana hakuwe 18, Muhanga: 17, Nyanza: 16, Musanze: 14, Ngoma: 7, Karongi, 7, Nyagatare: 5, Rulindo: 5, Gicumbi: 3, Kamonyi: 2, Nyamagabe: 2, Rubavu: 2 na Gisagara: 2.

Mu Rwanda hamaze gufatwa ibipimo 817,800, abasanganywe ubwandu bwa Coronavirus ni 12,443 mu gihe abamaze gukira ari 8,184 naho abakirwaye ni 4,094 mu gihe abamaze guhitanwa n’iki cyorezi ari 165.

Kuri ubu imibare y’abasangwamo COVID-19 ikomeje kwiyongera hirya no hino mu gihugu, gusa muri Kigali niho hakomeje kugaragara umubare munini w’abanduye kurusha ahandi hose mu gihugu, abahitanwa n’icyorezo nabo bakomeje kwiyongera.

Kuri uyu wa Gatanu nabwo abantu batatu bishwe na Coronavirus ni abo mu Mujyi wa Kigali barimo ufite imyaka 81, 77 na 52.

Ikigo cy’Igihugu cy’Ubuzima, RBC, cyatangaje ko kuva ku wa Gatandatu tariki 23 Mutarama, hazatangira gahunda yo gupima abantu bagera ku bihumbi 20 bo mu Mujyi wa Kigali, aho bazajya bapimwa hagendewe kuri buri kagari.

Mu tugari 161 tugize Umujyi wa Kigali, buri kamwe hazajya hapimwa abantu 125, aho abazibandwaho ari abarengeje imyaka 70, abafite indwara zidakira nka sida, diabete n’izindi.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .