Abantu barindwi banduye Coronavirus mu Rwanda, umwe ni we wakize

Yanditswe na Ishimwe Israel
Kuya 27 Gicurasi 2020 saa 07:57
Yasuwe :
0 0

Minisiteri y’Ubuzima yatangaje ko mu Rwanda habonetse abantu barindwi basanganywe Coronavirus mu bipimo 2059 byafashwe kuri uyu munsi mu gihe umwe ariwe wasezerewe mu bitaro nyuma yo gukira.

  • Abanduye ni 346 (barimo barindwi bashya)
  • Abakize ni 245 (barimo umwe mushya)
  • Abakirwaye ni 101
  • Nta muntu uritaba Imana
  • Ibipimo bimaze gufatwa ni 62 502 (birimo 2059 bishya)

Umurwayi wa mbere wa COVID-19 iterwa n’agakoko ka Coronavirus yabonetse mu Rwanda ku wa 14 Werurwe 2020, yari Umuhinde ukorera rimwe mu mashami ya Loni mu gihugu wari uvuye mu Mujyi wa Mumbai.

Kuva icyo gihe imibare yerekana ko abantu 346 bamaze kwandura mu gihe 245 basezerewe mu bitaro nyuma yo gukira ndetse ibipimo bikerekana ko nta virusi bagifite mu mibiri yabo.

Mu bitaro byita ku barwayi ba Coronavirus, umubare w’abarwariyemo wongeye kuzamuka ugera ku 101 mu gihe mu minsi ishize wagendaga ugabanuka. Abarwaye baritabwaho n’ababishinzwe kandi ntawe urembye.

Muri iyi minsi abarwayi ba Coronavirus bari kuboneka biganjemo abashoferi b’amakamyo yambukiranya imipaka n’abo bakorana.

Itangazo rya Minisante ryo kuri uyu wa 27 Gicurasi 2020 rivuga ko "abarwayi bashya bose bahise bashyirwa mu kato bakihagera.’’

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 5 741 807 bamaze kuyandura ku Isi yose, barimo 354 762 yahitanye na 2 470 546 bamaze kuyikira.

Abantu barindwi banduye Coronavirus mu Rwanda, umwe ni we wakize asezererwa mu bitaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .