Abandi bantu barindwi bakize Coronavirus, umubare w’abanduye mu Rwanda ugera ku 126

Yanditswe na Ishimwe Israel
Kuya 12 Mata 2020 saa 08:24
Yasuwe :
0 0

Abantu barindwi bari barwaye Coronavirus basezerewe mu bitaro mu gihe umubare w’abanduye mu Rwanda wageze ku 126 nyuma y’uko abantu batandatu basanganywe ubwandu mu bipimo 1160 byafashwe mu masaha 24 ashize.

Kuva umurwayi wa mbere w’icyorezo cya COVID-19 giterwa n’agakoko gashya ka Coronavirus abonetse mu Rwanda ku wa 14 Werurwe 2020, hamaze gutahurwa abantu 126 bayirwaye, muri bo abantu 25 barasezerewe nyuma yo gusuzumwa bagasangwa nta bwandu bafite mu maraso yabo, mu gihe nta n’umwe uritaba Imana.

Itangazo rya Minisiteri y’Ubuzima ryo kuri iki Cyumweru rivuga ko mu ’bamaze gusezererwa harimo barindwi bakize mu masaha 24 ashize.’

Rikomeza rigaragaza ko abarwayi bashya babonetse kuri uyu wa 12 Mata 2020, ari "abantu batandatu batahuwe ko bahuye n’abandi barwaye Coronavirus mu Rwanda.’’

Minisante ivuga ko “Aba bagaragaweho Coronavirus bose bahise bashyirwa mu kato kandi hakomeje gushakishwa abantu bose bahuye nabo kugira ngo basuzumwe ndetse bitabweho n’inzego z’ubuzima. Umuntu wese uhisha cyangwa wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byabo, aba ashyize ubuzima bwa benshi mu kaga kandi abihanirwa n’amategeko.”

Abarwayi bose bavurirwa ahantu habugenewe kandi barimo koroherwa, ndetse abenshi ubu nta bimenyetso bya Coronavirus bagaragaza, kandi nta n’umwe urembye.

Ku wa 5 Mata 2020 nibwo abantu bane ba mbere barimo Abanyarwanda batatu n’Umurundi umwe basezerewe aho bari barwariye mu Kigo Nderabuzima cya Kanyinya, nyuma yo gusuzumwa ibipimo bikerekana ko nta bwandu bagifite.

Minisitiri w’Ubuzima, Dr Ngamije Daniel, ku wa Gatandatu, yatangaje ko abantu 11 bari bamaze igihe barwaye basezerewe mu bitaro.

Yagize ati “Mu bantu bose tumaze gusuzuma, abantu 118 bagaragayeho ubu burwayi kugeza uyu munsi wa none. Muri bo tumaze gusezerera barindwi, twasezereye barindwi ku cyumweru gishize, ndetse uyu munsi wa none turasezerera abantu 11.”

Minisiteri y’Ubuzima imaze gusuzuma abantu 8000 ariko kubera ko hari abagiye basuzumwa inshuro zirenze imwe ibipimo byafashwe birenga 11 000.

Leta yafashe ingamba zo guhangana n’ikwirakwira rya Coronavirus. Ku wa 1 Mata 2020 nibwo Guverinoma y’u Rwanda yafashe icyemezo cyo kongera iminsi 15 ku ngamba zafashwe zo guhangana na Coronavirus zirimo gufunga imipaka no kuguma mu rugo, ingendo zigakorwa gusa n’abajya gushaka cyangwa gutanga serivisi zihutirwa nko guhaha no kwivuza.

Abanyarwanda basabwa gukomeza kwitwararika, ndetse nk’uko byatangajwe na Leta y’u Rwanda, abantu bose basabwa kuguma mu ngo, gukaraba intoki kenshi hifashishijwe amazi meza n’isabune cyangwa alukolo yabugenewe, kubahirizwa intera ya metero imwe hagati y’umuntu n’undi no gushyira mu kato k’ibyumweru bibiri uwinjiye mu Rwanda wese.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Umuntu ugaragaza ibimenyetso bya Coronavirus asabwa guhamagara ku 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.

Coronavirus yakangaranyije Isi, kuva yaboneka mu Bushinwa abantu 1 836 959 bamaze kuyandura, 113 261 yarabahitanye mu gihe 421 363 bamaze kuyikira.

Abandi bantu barindwi basezerewe mu bitaro, umubare w’abanduye Coronavirus mu Rwanda ugera ku 126

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .