Abantu babiri bishwe na COVID-19, abayanduye biyongeraho 217

Yanditswe na Ishimwe Israel
Kuya 24 Kanama 2020 saa 10:27
Yasuwe :
0 0

Minisiteri y’Ubuzima yatangaje ko abantu babiri bishwe na COVID-19 mu gihe abagera kuri 217 barimo 202 bapimwe mu masoko yo mu Mujyi wa Kigali basanganywe iki cyorezo.

Babiri bishwe n’iki cyorezo umwe yari afite imyaka 64 mu gihe undi yari afite imyaka 70. Byatumye umubare w’abamaze guhitanwa n’iki cyorezo mu gihugu ugera kuri 14.

Umuyobozi w’Ikigo cy’Igihugu gishinzwe Ubuzima, Dr Nsanzimana Sabin, yari aherutse gutangaza ko mu Rwanda hari abarwayi ba Coronavirus 10 bashyizwe ku mashini zibongera umwuka.

Mu barwayi bashya bagaragaye kuri uyu wa Mbere tariki ya 24 Kanama 2020, uko ari 217 barimo 202 bagaragaye muri Kigali aho bapimwe mu masoko; icumi bagaragaye i Rusizi bapimwe mu bibasiwe kurusha abandi, babiri i Rubavu, umwe i Nyamasheke kimwe n’i Kamonyi hamwe n’i Nyanza.

Aba barwayi bagaragaye bahise batuma umubare w’abamaze kwandura mu Rwanda uba 3.306 mu gihe ibipimo bimaze gufatwa byo ari 371 886. Abamaze gukira mu Rwanda ni 1.785 barimo 30 bakize kuri uyu wa Mbere mu gihe abakirwaye bo ari 1507.

Kuva umurwayi wa mbere wa COVID-19 agaragaye mu Rwanda ku wa 14 Werurwe 2020, ni ku nshuro ya mbere habonetse abitaba Imana mu minsi ibiri ikurikirana kuko no ku wa 23 Kanama hatangajwe umwe wahitanywe n’iki cyorezo.

Mu minsi ibiri gusa mu Rwanda habonetse abarwayi 417 banduye COVID-19, imibare nayo iri hejuru kuruta indi minsi.

Dr Nsanzimana yari aherutse gutangaza ko mu gihe imibare y’ubwandu yakomeza kwiyongera, byatuma n’abantu bapfa nabo biyongera.

Ati “Imibare nikomeza kuzamuka gutya mu mezi abiri biraba bimeze bite, impfu ziriyongera, ubukungu buragirwaho ingaruka. Nta muntu n’umwe wakwifuza ko COVID-19 isakara ahantu hose, abakuze tukababura, abantu babyibushye tukababura.’’

Minisiteri y’Ubuzima itangaza ko ubwiyongere bw’abarwayi ba Coronavirus mu gihugu bwaturutse ku bantu bakorera mu masoko yo mu Mujyi wa Kigali aho ahanini biterwa no kuba abantu baradohotse ku ngamba zo kurwanya iki cyorezo.

Nubwo serivisi nyinshi zikomeje gufungurwa, abanyarwanda barasabwa kutirara ngo bumve ko icyorezo cyarangiye. Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa buri gihe bavuye mu ngo, bakaraba intoki kenshi, birinda amakoraniro n’ibindi bintu byose bishobora guhuriza hamwe abantu benshi, ndetse by’umwihariko uwiyumvamo ibimenyetso by’iki cyorezo birimo inkorora, guhumeka nabi, gucika intege n’ibindi, agahamagara umurongo utishyurwa wa 114 kugira ngo ahabwe ubufasha n’abaganga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .