Abantu babiri bishwe na Coronavirus mu Rwanda, 109 bayanduye

Yanditswe na Ishimwe Israel
Kuya 21 Ukuboza 2020 saa 11:06
Yasuwe :
0 0

Minisiteri y’Ubuzima yatangaje ko abandi bantu babiri bishwe na COVID-19 mu Rwanda, bituma umubare w’abamaze guhitanwa n’iki cyorezo ugera kuri 65.

Umubare w’abicwa na COVID-19 mu Rwanda ukomeje kwiyongera cyane kuko mu minsi ibiri gusa, abantu batandatu bamaze guhitanwa n’iki cyorezo.

Abitabye Imana kuri uyu wa Mbere, tariki ya 21 Ukuboza 2020, barimo ‘umugore w’imyaka 39 w’i Kigali n’umugabo w’imyaka 58 w’i Gicumbi.’

Itangazo rya Minisante ryerekana ko ubwiyongere buri no mu mibare y’abandura.

Rivuga ko uyu munsi habonetse abarwayi bashya 109 mu bipimo 4229; bakuwe muri ‘Kigali: 56, Ngororero: 12, Rubavu: 12, Nyabihu: 8, Muhanga: 5, Huye: 4, Rusizi: 4, Kamonyi: 3, Gicumbi: 3, Musanze: 2.’

Kuva COVID-19 iterwa n’agakoko gashya ka Coronavirus igaragaye mu Rwanda muri Werurwe 2020, umubare w’abamaze kuyandura ni 7402 mu bipimo 694 450 bimaze gufatwa, mu gihe 6100 ari bo bayikize basezererwa nyuma yo gupimwa bagasangwa nta bwandu bagifite, naho 1237 bakaba bakiri kwitabwaho.

Minisitiri w’Ubuzima, Dr Daniel Ngamije, yavuze ko bikwiye ko Abanyarwanda bakaza ingamba mu kwirinda ko hashyirwaho ibyemezo bikomeye birimo na Guma mu Rugo.

Yagize ati “Imibare y’abandura COVID-19 n’abo ihitana mu gihugu cyacu ikomeje kwiyongera ku rugero ruhangayikishije. Igihe cyo gukaza ingamba zo kwirinda no kurinda abacu ni iki.’’

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .