Abantu babiri barimo uw’imyaka 14 bishwe na Coronavirus mu Rwanda, 100 barayandura

Yanditswe na Ishimwe Israel
Kuya 12 Ukuboza 2020 saa 09:30
Yasuwe :
0 0

Minisiteri y’Ubuzima yatangaje ko abantu babiri bo mu Mujyi wa Kigali bishwe na Coronavirus bituma umubare w’abamaze guhitanwa n’iki cyorezo ugera mu Rwanda uba 56.

Abitabye Imana barimo umukobwa w’imyaka 14 n’umugabo ufite 61 bose bo muri Kigali.

Ni ku nshuro ya mbere mu Rwanda, umuntu muto ahitanwe na COVID-19 iterwa n’agakoko ka Coronavirus kuva iki cyorezo cyagera mu Rwanda muri Werurwe 2020.

Itangazo rya Minisante ryo kuri uyu wa Gatandatu ryerekanye ko usibye babiri bahitanywe na COVID-19, abantu 100 banduye iki cyorezo mu bipimo 3813 byafashwe mu gihe 66 aribo bakize mu masaha 24 ashize.

Abarwayi bashya bagaragaye muri “Kigali: 52, Rubavu: 21, Huye: 9, Ruhango: 7, Rusizi: 4, Muhanga: 4, Gakenke: 2, Rwamagana: 1.’’

Kuva ku wa 14 Werurwe 2020 ubwo umurwayi wa mbere yabonekaga mu Rwanda hamaze gufatwa ibipimo bya Coronavirus 665 450, byasanzwemo 6528 banduye. Muri bo 5892 barasezerewe nyuma yo gupimwa bagasangwa nta bwandu bagifite mu mibiri yabo mu gihe 580 aribo bakiri kwitabwaho.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .