Abantu 93 barimo 80 bakuwe i Kigali banduye Coronavirus, 46 nibo bayikize

Yanditswe na Ishimwe Israel
Kuya 14 Kanama 2020 saa 11:53
Yasuwe :
0 0

Minisiteri y’Ubuzima yatangaje ko abantu 93 barimo 80 bagaragaye mu Mujyi wa Kigali basanganywe Coronavirus mu bipimo 4610 byafashwe uyu munsi bituma abayanduye mu Rwanda bagera ku 2293 mu gihe 46 bakize, umubare w’abamaze gusezererwa mu bitaro uba 1604.

Itangazo rya Minisante ryo kuri uyu wa Gatanu, tariki ya 14 Kanama 2020, ryerekana ko abarwayi bashya bavuye mu bice bitandukanye by’igihugu ariko abenshi ari abo muri Kigali.

Rigira riti “Kigali (80) & Rusizi (13) bapimwe mu bibasiwe kurusha abandi no mu midugudu iri mu kato.’’

Umurwayi wa mbere wa COVID-19 iterwa n’agakoko ka Coronavirus yagaragaye mu Rwanda ku wa 14 Werurwe 2020. Kuva icyo gihe hamaze kuboneka 2293 bayanduye mu bipimo 323 905 bimaze gufatwa, 1604 barayikize mu gihe 681 bakirwaye naho umunani bitabye Imana.

Ubwandu bushya bwongeye kugarara ku bantu benshi mu gihe kuva ukwezi kwa Kanama kwatangira, abantu benshi banduye basezererwaga mu bitaro.

Ni ku nshuro ya kabiri mu Rwanda habonetse umubare munini w’abanduye, kuko umunini wabonetse ni 101 bagaragaye tariki ya 29 Kamena 2020. Icyo gihe barimo abakuwe muri “Kigali:22, Rusizi:3, Rubavu:2, Kayonza:1, Kirehe:1 & mu itsinda ry’abagororwa muri Ngoma:72 bahuye n’abanduriye i Rusumo.’’

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .