Abantu 72 barimo abagororwa n’impunzi banduye Coronavirus mu Rwanda

Yanditswe na Ishimwe Israel
Kuya 26 Ugushyingo 2020 saa 09:25
Yasuwe :
0 0

Minisiteri y’Ubuzima yatangaje ko abantu 72 barimo abagororwa bo muri Gereza ya Rwamagana n’impunzi zo mu Nkambi ya Kigeme basanganywe Coronavirus mu bipimo 2991 mu gihe 28 aribo bayikize mu masaha 24 ashize.

Itangazo rya Minisante rigaragaza ko abarwayi bashya bakuwe mu duce dutandukanye mu gihugu.

Rigira riti “Kigali: 6, Rwamagana: 30 mu bapimwe muri Gereza ya Rwamagana, Nyamagabe: 19 mu bapimwe mu Nkambi ya Kigeme, Musanze: 9, Nyanza: 2, Gicumbi: 2, Bugesera: 2 na Rubavu: 2.’’

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva COVID-19 igaragaye mu Rwanda, hamaze kuboneka abantu 5851 bayanduye mu bipimo 617 258 bimaze gufatwa. Muri bo 5345 barasezerewe nyuma yo gupimwa bagasangwa nta bwandu bwayo bukiri mu maraso yabo mu gihe 459 bakirwaye. Abantu 47 nibo bamaze guhitanwa n’iki cyorezo.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 61,155,815 bamaze kuyandura ku Isi yose, barimo 1,434,569 yahitanye mu gihe 42,304,008 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .