Abantu 69 barimo 34 b’i Kigali banduye Coronavirus mu Rwanda, 11 bayikize

Yanditswe na Ishimwe Israel
Kuya 26 Nyakanga 2020 saa 10:18
Yasuwe :
0 0

Minisiteri y’Ubuzima yatangaje ko abantu 69 barimo 34 bakuwe mu Mujyi wa Kigali
basanganywe Coronavirus mu gihe 11 aribo bakize basezererwa mu bitaro.

Itangazo rya Minisante ryo kuri uyu wa 26 Nyakanga 2020, rigaragaza ko abarwayi bashya bakuwe ahantu hatandukanye mu gihugu biganjemo abasanzwe muri Kigali.

Kuri iki Cyumweru, abantu 69 basanzwemo Coronavirus mu bipimo 4122 byafashwe kuri uyu munsi, bituma umubare w’abamaze kwandura uba 1821 mu gihe 11 ari bo bayikize, abamaze gukira, bagasezererwa mu bitaro baba 918.

Mu barwayi bashya, abakuwe muri Kigali ni 34, mu Karere ka Nyamasheke hasanzwe 16 barimo abapimiwe mu midugudu iri mu kato), i Rusizi habonetse16 (mu batahuwe ko bahuye n’abanduye) mu gihe mu Turere twa Kirehe, Ngoma na Rwamagana hose hakuwe umwe.

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva icyo gihe hamaze gufatwa ibipimo 242 129 byabonetsemo abantu 1821 banduye. Muri bo 918 barakize, 898 baracyari kwitabwaho mu bitaro mu gihe abantu batanu bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .