Abantu 62 banduye Coronavirus, nta wakize

Yanditswe na Ishimwe Israel
Kuya 7 Ukuboza 2020 saa 10:28
Yasuwe :
0 0

Minisiteri y’Ubuzima yatangaje ko abantu 62 basanganywe icyorezo cya Coronavirus mu bipimo 2182 byafashwe mu masaha 24 yashize mu gihe nta murwayi wayikize.

Abarwayi bashya bagaragaye mu bice bitandukanye by’igihugu aho abenshi ari abo mu Mujyi wa Kigali ahakuwe 50 mu gihe i Musanze ari barindwi, Rubavu hakurwa batatu, naho Uturere twa Ngororero na Rusizi, buri hose havanwa umwe.

Ni ku munsi wa kabiri wikurikiranya nta murwayi bitangajwe ko yakize Coronavirus mu Rwanda kuko itangazo ryo ku wa 6 Ukuboza 2020 naryo ryari ryerekanye ko nta muntu wakize.

Imibare ya Minisante igaragaza ko kuva umurwayi wa mbere wa COVID-19 iterwa n’agakoko ka Coronavirus agaragaye mu Rwanda, hamaze kuboneka 6191 banduye mu bipimo 646 813 byafashwe.

Abakize bagasezererwa ni 5696 mu gihe 444 bo bakiri kwitabwaho. Kugeza ubu abantu 51 ni bo bamaze kwitaba Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .