Abantu 26 banduye Coronavirus mu Rwanda, abayikize ni 12

Yanditswe na Ishimwe Israel
Kuya 13 Nzeri 2020 saa 09:37
Yasuwe :
0 0

Minisiteri y’Ubuzima yatangaje ko abantu 26 basanganywe Coronavirus mu bipimo 2722 by’uyu munsi mu gihe abasezerewe mu bitaro biyongereyeho 12 bituma umubare w’abakize mu Rwanda uba 2556.

Itangazo rya Minisante ryo kuri iki Cyumweru rigaragaza ko abarwayi bashya biganjemo abakuwe mu Mujyi wa Kigali ahabonetse 22 bapimwe mu bibasiwe kurusha abandi, i Musanze hakuwe babiri mu gihe mu Turere twa Nyanza na Kirehe buri hose hakuwe umwe.

Ijanisha ku bapfa rihagaze kuri 0.48%, mu gihe iry’abandura ari 1.0%.

Tariki 14 Werurwe 2020 nibwo Minisiteri y’Ubuzima yemeje ko umuntu wa mbere yasanganywe icyorezo cya COVID-19 giterwa n’agakoko gashya ka Coronavirus.

Kuva COVID-19 igaragaye mu Rwanda, hamaze kuboneka abantu 4591 bayanduye mu bipimo 462 896 bimaze gufatwa. Muri bo 2556 barasezerewe nyuma yo gupimwa bagasangwa nta bwandu bwayo bukiri mu maraso yabo mu gihe 2013 bakirwaye mu gihe 22 bamaze guhitanwa n’iki cyorezo.

Ikigo cy’Igihugu cy’Ubuzima, RBC, cyatangaje ko impamvu imibare y’abantu bapimwa icyorezo cya COVID-19 mu Rwanda ugenda ugabanuka ugereranyije n’umubare w’ibipimo byafatwaga mbere ndetse n’abandura bagenda baba bake.

Guhera ku wa 8 Nzeri abantu bapimwe bari 3253, ku wa 9 Nzeri bari 3805,Ku wa 10 Nzeri bari 2838 ku wa 11 Nzeri bari 3027 ku wa 12 Nzeri bari 2901. Iyi mibare ni mito ugereranyije n’abantu 4420 bapimwe ku wa 5 Nzeri, 5622 bapimwe ku wa mbere Nzeri cyangwa abantu 5544 bari bapimwe ku wa 30 Kanama n’abandi barenga ibihumbi bitandatu bari bapimwe ku munsi wari wabanje.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .