Abantu 24 basanganywe Coronavirus mu Rwanda

Yanditswe na Ishimwe Israel
Kuya 16 Kamena 2020 saa 09:23
Yasuwe :
0 0

Minisiteri y’Ubuzima yatangaje ko abantu 24 basanganywe Coronavirus mu bipimo 2742 byafashwe uyu munsi bituma abayanduye mu Rwanda bagera kuri 636 mu gihe umubare w’abamaze gusezererwa mu bitaro wagumye kuri 338.

  • Abanduye ni 636 (Barimo 24 bashya)
  • Abakize ni 338 (Nta mushya urimo)
  • Abakirwaye ni 296
  • Abantu babiri bamaze kwitaba Imana
  • Ibipimo bimaze gufatwa ni 96 801 (Ibipimo bishya 2742)

Itangazo rya Minisante ryo kuri uyu wa Kabiri ryerekana ko ‘‘abarwayi bashya bagaragaye muri Rusizi ndetse no mu Banyarwanda batashye.’’

Ubwandu bushya buboneka ku butaka bw’u Rwanda bufitanye isano n’abakora ingendo zambukiranya imipaka, irimo uw’u Rwanda na Repubulika Iharanira Demokarasi ya Congo mu Karere ka Rusizi n’uwa Rusumo mu Karere ka Kirehe.

Mu minsi ine gusa mu Rwanda hamaze kuboneka abarwayi 126 basanganywe Coronavirus.

Umurwayi wa mbere wa COVID-19 iterwa n’agakoko ka Coronavirus yagaragaye mu Rwanda ku wa 13 Werurwe 2020, hamaze kuboneka 636 bayanduye mu bipimo 96 801 bimaze gufatwa, 338 barayikize mu gihe 296 bakirwaye naho babiri barimo umushoferi w’imyaka 65 n’umupolisikazi bitabye Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .