Abantu 21 banduye Coronavirus mu Rwanda, 22 barayikira

Yanditswe na Ishimwe Israel
Kuya 23 Nyakanga 2020 saa 09:26
Yasuwe :
0 0

Minisiteri y’Ubuzima yatangaje ko abantu 21 basanganywe Coronavirus mu bipimo 5534 byafashwe mu masaha 24 yashize, bituma umubare w’abayanduye mu Rwanda ugera ku 1710 mu gihe 22 basezerewe mu bitaro, abamaze gukira baba 889.

Itangazo rya Minisante ryo kuri uyu wa Kane, tariki ya 23 Nyakanga 2020, ryerekanye ko abagaragayeho Coronavirus mu gihugu bakuwe mu duce two mu Ntara y’Uburengerazuba no mu Mujyi wa Kigali.

Rigira riti ‘‘Abarwayi bashya bagaragaye Kigali:7 (abapimiwe mu duce turi mu kato), Rusizi:7, Nyamasheke:7.’’

Mu bantu 231 186 bose bamaze gupimwa Coronavirus mu Rwanda kuva umurwayi wa mbere agaragaye mu gihugu ku wa 14 Werurwe 2020, abantu 1710 barayanduye mu gihe 889 basezerewe mu bitaro nyuma yo gukira, bakanapimwa bagasangwa nta virusi bagifite mu mibiri yabo. Abakirwaye bitabwaho byihariye ni 816 mu gihe batanu bitabye Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 15 530 121 bamaze kuyandura ku Isi yose, barimo 633 034 yahitanye na 9 446 618 bamaze kuyikira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .