Abantu 14 banduye Coronavirus mu Rwanda, batanu nibo bayikize

Yanditswe na Ishimwe Israel
Kuya 4 Ukwakira 2020 saa 08:50
Yasuwe :
0 0

Minisiteri y’Ubuzima yatangaje ko abantu 14 basanzwemo COVID-19 mu bipimo 1853 byafashwe bituma umubare w’abamaze kwandura uba 4866 mu gihe batanu ari bo bayikize.

Abarwayi bashya bagaragaye kuri iki Cyumweru, barimo 12 bakuwe muri Kigali aho bapimwe mu bibasiwe kurusha abandi mu gihe i Burera ndetse n’i Rubavu, buri hose hakuwe umurwayi umwe.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze kuboneka 4866 banduye mu bipimo 504 670 bimaze gufatwa, 3216 barayikize mu gihe 1621 bakiri kwitabwaho; 29 bitabye Imana.

Mu rwego rwo gukomeza kugenzura uko icyorezo cya COVID-19 gihagaze mu Mujyi wa Kigali, kuri iki Cyumweru, Ikigo cy’Igihugu cy’Ubuzima, RBC, cyapimye abantu batandukanye bitabiriye amateraniro hirya no hino mu nsengero zo muri uyu mujyi.

Mu nsengero zakoreweho ibi bikorwa byo gupima COVID -19 harimo Cathedral St Michel, EAR Remera na ERC Masoro aho nibura hafashwe ibipimo 400.

Mu kiganiro aheruka kugirana n’abanyamakuru, Minisitiri w’Ubuzima, Dr Ngamije Daniel, yavuze ko muri iyi minsi ubwandu bushya burimo kugabanuka, nubwo bitavuze ko icyorezo kirimo kurangira.

Ati “Kikaba ari ikimenyetso cyerekana ko abantu bikubise agashyi, bubahiriza amabwiriza ajyanye no kwirinda COVID-19. Imibare dufite irashimishije ugereranyije n’uko byari bimeze mu kwezi kwa munani, ariko urugamba ruracyari rwose.”

Nubwo serivisi nyinshi zikomeje gufungurwa, Abanyarwanda basabwa kutirara ngo bumve ko icyorezo cyarangiye.

Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa n’amazuru buri gihe bavuye mu ngo, bakaraba intoki kenshi no kwirinda amakoraniro n’ibindi bintu byose bishobora guhuriza hamwe abantu benshi.

Umuntu ugaragaza ibimenyetso bya Coronavirus birimo inkorora, guhumeka nabi, gucika intege n’ibindi, agirwa inama yo guhamagara umurongo utishyurwa wa 114 kugira ngo ahabwe ubufasha n’abaganga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .