Abantu 13 basanganywe Coronavirus i Rusizi, abanduye mu Rwanda baba 410

Yanditswe na Ishimwe Israel
Kuya 4 Kamena 2020 saa 09:20
Yasuwe :
0 0

Imibare ya Minisiteri y’Ubuzima yerekanye ko abantu 13 basanganywe Coronavirus mu Rwanda mu bipimo 1369 byafashwe mu masaha 24 bituma umubare w’abamaze kwandura ugera kuri 410 mu gihe abakize biyongereyeho icyenda baba 289.

Itangazo rya Minisante rigaragaza ko abarwayi bashya bose basanzwe mu Karere ka Rusizi mu Burengerazuba bw’u Rwanda.

Rikomeza riti “Abarwayi bashya bagaragaye mu Karere ka Rusizi. Bashyizwe mu kato n’abo bahuye bahise bakurikiranwa.’’

  • Abanduye ni 410 (Barimo 13 bashya)
  • Abakize ni 280 (Barimo icyenda bashya)
  • Abakirwaye ni 128
  • Abantu babiri bamaze kwitaba Imana
  • Ibipimo bimaze gufatwa ni 72 510 (Ibipimo bishya 1369)

Kuva ku wa 31 Gicurasi 2020, Akarere ka Rusizi kabaye izingiro rya Coronavirus mu Rwanda, aho mu minsi ine gusa hamaze kugaragara abantu 36 banduye iki cyorezo.

Aba barimo abacuruzi bambukiranya imipaka, abashoferi batwara ibintu babivanye cyangwa babijyanye i Bukavu muri Repubulika Iharanira Demokarasi ya Congo n’umumotari ndetse n’abahuye na bo.

Inama y’Abaminisitiri yateranye ku wa 2 Kamena 2020 yafashe ingamba zitandukanye zigamije gukomeza kwirinda ikwirakwira ry’icyorezo cya Coronavirus, zirimo ko moto zitwara abagenzi zemerewe gusubukura ibikorwa uretse mu turere twa Rusizi na Rubavu, ndetse ko ingendo hagati y’intara zemewe ariko ko kujya no kuva mu Karere ka Rusizi na Rubavu byo bibujijwe.

Mu guhangana n’ikwirakwira rya Coronavirus muri Rusizi, kuva kuri uyu wa 4 Kamena 2020 hanzuwe ko imirenge ya Kamembe, Nyakarenzo, Mururu n’igice cya Gihundwe igize Umujyi wa Kamembe mu Karere ka Rusizi isubizwa muri gahunda ya Guma mu Rugo mu gihe cy’ibyumweru bibiri mu kwirinda ikwirakwira rya Coronavirus.

Abemerewe gukora ingendo ni abajya gutanga cyangwa gushaka serivisi za ngombwa nko guhaha ibiribwa n’ibikoresho by’isuku no kwivuza.

Akarere ka Rusizi gahana imbibi na Repubulika Iharanira Demokarasi ya Congo ndetse ubwandu bwakagaragayemo bufitanye isano n’ingendo zambukiranya imipaka.

Imibare igaragaza ko RDC iri mu bihugu byugarijwe na Coronavirus mu bikikije u Rwanda kuko abantu 3643 bamaze kuyandura, muri bo 495 barayikize mu gihe 77 yabahitanye.

U Rwanda na RDC byaherukaga kwemeranya ku kongera kunoza imikoranire mu bucuruzi bwambukiranya imipaka ariko hakazwa ingamba mu kwirinda ikwirakwira rya Coronavirus. Ubwandu bushya buri kuboneka bushobora gukoma mu nkokora iyubahirizwa ry’uwo mwanzuro.

Abaturarwanda muri rusange basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 13 Werurwe 2020, hamaze kuboneka 410 banduye mu bipimo 72 510 bimaze gufatwa, 280 barayikize mu gihe 128 bakirwaye naho babiri bitabye Imana.

Abitabye Imana barimo umushoferi w’imyaka 65 wari utuye mu gihugu cy’abaturanyi, wahisemo gutaha mu Rwanda nyuma yo kuremba ndetse n’umupolisikazi w’imyaka 24 wari waragiye mu butumwa bw’akazi mu mahanga. Aba bombi bagaruwe mu Rwanda barembye cyane bitabwaho n’abaganga mu kigo cyagenewe kuvura Coronavirus ariko baza gupfa.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abantu 13 basanganywe Coronavirus i Rusizi, abanduye mu Rwanda baba 410 mu gihe abamaze gukira biyongereyeho icyenda baba 280

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .