• Abanduye ni 1485 (Barimo 12 bashya)
• Abakize ni 811 (Barimo 41 bashya)
• Abakirwaye ni 670
• Abantu bane bamaze kwitaba Imana
• Ibipimo bimaze gufatwa ni 203 790 (Ibipimo bishya 3432)

Itangazo rya Minisiteri y’Ubuzima ryo kuri uyu wa Gatanu, ryerekanye ko abarwayi bashya ba COVID-19 iterwa n’agakoko ka Coronavirus, bagaragaye muri Kigali.

Rikomeza rivuga ko abarwayi bashya 12 basanzwe mu Mujyi wa Kigali bakuwe mu itsinda riri mu kato ryitabwaho by’umwihariko.

Kuva umurwayi wa mbere wa Coronavirus agaragaye mu Rwanda ku wa 14 Werurwe 2020, hamaze kuboneka abantu 1485 banduye, muri bo 811 barakize basezererwa mu bitaro, 670 baracyitabwaho n’abaganga mu gihe bane bitabye Imana.

Tariki ya 17 Nyakanga 2020, yanditse andi mateka mashya kuva umurwayi wa mbere abonetse mu Rwanda kuko umwe mu bavurirwa Coronavirus mu Kigo Nderabuzima cya Rugerero mu Karere ka Rubavu, yahabyariye umwana w’umuhungu. Ubu we n’umwana we bameze neza.

Ni ubwa mbere mu Rwanda umugore uri kuvurwa Coronavirus abyariye aho arimo kuvurirwa ariko mu bindi bihugu byakunze kubaho kenshi. Urugero ni umugore wo mu Murwa mukuru wa Cameroun i Yaoundé wabyaye umwana w’umukobwa muri Mata 2020.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda muri rusange basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 14 099 366 bamaze kuyandura ku Isi yose, barimo 595 419 yahitanye na 8 392 789 bamaze kuyikira.

17.07.20 – Covid-19 Amakuru Mashya | Update

*Kigali:12 (Itsinda riri mu kato ryitabwaho by’umwihariko/high-risk isolated cluster) pic.twitter.com/iaH1AT0MUs

— Ministry of Health | Rwanda (@RwandaHealth) July 17, 2020