Abamaze gukira Coronavirus mu Rwanda biyongereyeho 15 baba 1237

Yanditswe na Ishimwe Israel
Kuya 5 Kanama 2020 saa 09:48
Yasuwe :
0 0

Abantu 15 bakize icyorezo cya COVID-19 mu gihe batanu basanganywe ubwandu mu bipimo 4598 byafashwe mu masaha 24 yashize.

Minisiteri y’Ubuzima mu itangazo ryayo ryo kuri uyu wa Gatatu, yagaragaje ko abantu batanu basanzwemo Coronavirus mu bipimo 4598 byafashwe, bituma umubare w’abamaze kwandura uba 2104 mu gihe 15 bayikize, abamaze gusezererwa mu bitaro baba 1237.

Rikomeza riti “Abarwayi bashya bagaragaye i Kigali ahakuwe bane bapimwe mu bibasiwe kurusha abandi n’undi umwe wavuye i Nyagatare.’’

Kuva umurwayi wa mbere wa COVID-19 iterwa na Coronavirus agaragaye mu Rwanda ku wa 14 Werurwe 2020, hamaze gupimwa abantu 283 055, muri bo abagera ku 2104 barayisanganywe, 1237 barayikira, 862 baracyari kwa muganga mu gihe batanu bitabye Imana.

Muri iyi minsi imibare y’abantu bakira Coronavirus iri kwiyongera cyane ugereranyije n’abandura. Mu minsi itanu ya mbere y’ukwezi kwa Kanama 2020, imibare igaragaza ko hakize 131 mu gihe abarwayi bashya basanganywe ubwandu bagera kuri 82.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .