Uteteyese ukora muri Baho International Hospital yasobanuye ibibera muri laboratwari nyuma yo gutanga ikizamini (Video)

Yanditswe na Iradukunda Serge
Kuya 30 Ugushyingo 2020 saa 06:50
Yasuwe :
0 0

Laboratwari niyo zingiro ry’ubuvuzi ku ndwara nyinshi zisaba kwisuzumisha kuko iyo nta bisubizo biraboneka, biba bigoye ko umuganga yamenya umuti uvura indwara y’uwaje amugana.

Abantu benshi ntabwo basobanukiwe neza akazi umukozi wo muri laboratwari akora ku bizamini umurwayi atanga kwa muganga.

Hari abibwira ko ari ibintu bikorwa mu kanya gato ndetse rimwe na rimwe mu gihe bategereje igisubizo ugasanga barijujutira ko byatinze.

Hari n’abajya kubaza muganga impamvu ibisubizo byabo byatinze wenda bibwira ko abo muri laboratwari bagize uburangare mu kazi bigatuma badatanga ibisubizo by’ibizamini.

Iyo winjiye muri Laboratwari uhasanga ibyuma kabuhariwe mu gupima ibizamini ku buryo ushobora kwibaza impamvu ibyo byuma bidahita bitanga ibisubizo mu masegonda make maze ngo abarwayi bavurwe vuba batahe.

Nyamara, burya umukozi wo muri laboratwari ntaba yicaye, aba akora ibishoboka byose ngo asuzume neza kandi agaragaze nyirabayazana w’uburwayi bwahagurukije umuntu mu rugo akagana muganga ngo arebe ko yasanasana iminsi ikicuma.

Mbere yo gusuzuma ikizamini runaka, baba bagomba kubanza kureba neza niba ingano y’ikizamini ihagije hanyuma bakakijyana mu gashami runaka bitewe n’icyo ari cyo kuko laboratwari igira amashami atandukanye.

Mu kiganiro IGIHE yagiranye n’umukozi uhagarariye laboratwari y’Ibitaro bya Baho International Hospital, Uteteyese Nadine, yavuze ko ibizamini byose bigira igihe cyagenwe cyo gutegereza kugira ngo umuntu abone ibisubizo ku buryo ngo hari n’ibizamini bimara iminsi itanu bisuzumwa hataraboneka ibisubizo.

Yagize ati "Hari ikizamini kiza ako kanya ugahita ugipima hakaba n’ikindi kiza ukabanza ukagitegura ugategereza amasaha aya n’aya, bikagusaba kukibika ahantu hari ubushyuhe buri ku kigero runaka ukagipima nka nyuma y’amasaha atatu gutyo gutyo. Hari n’ibisaba ko uzajya ubireba buri gitondo ukareba impinduka ukazatanga igisubizo nko mu minsi nk’itanu."

Gusa ngo hari nk’ikizamini kiza bagahita bagipima bidasabye kunyura mu nzira nyinshi ku buryo mu minota itageze kuri itanu baba babonye igisubizo.

Kuki hari usabwa gutanga ibizamini mu gitondo kare atararya?

Hari ubwo umuntu ajya kwa muganga, bakamusaba kuzagaruka gutanga ikizamini runaka ariko bakamusaba kugitanga nta kinyobwa cyangwa ikiribwa arafata.

Ibi Uteteyese yabisobanuye agira ati "Hari ibizamini dukunda gusaba ko umuntu abitanga atararya, nko kuri diyabete dusabwa kureba ingano y’isukari mu maraso, icyo gihe iyo hari ikintu wanyweye kirimo isukari gishobora gutuma ingano y’isukari izamuka ukabona ibisubizo utakagombye kubona."

Ikindi ni uko ngo hari ibizamini bisaba ko umuntu abitanga mu gitondo kare akibyuka umubiri we utarakora cyane ngo hazemo impinduka.

Ati "Uko umubiri ugenda ukora niko ugenda utakaza ibintu runaka, niko umubiri ugenda utakaza isukari n’ibindi, ubwo icyo gihe impamvu tubwira umurwayi ngo aze kare mu gitondo nta n’ikintu ararya nuko icyo gihe umubiri we uba ukiri umwimerere nta bindi bintu biriyongeramo."

Kuki umuntu ashobora kwisuzumisha Malaria uyu munsi ntiboneke ejo yasubirayo ikaboneka?

Abantu bakunze kurwara malaria ibi barabizi, hari igihe biyumvamo ibimenyetso bya malaria ariko bagera kwa muganga bakababwira ko mu maraso yabo nta malaria irimo.

Ibi bijya bituma kenshi abarwayi bitotombera abaganga ko babavuye nabi, abandi bati ibyuma byo kuri biriya bitaro ntibikora neza.

Ibi muganga Uteteyese yabisobanuye agira ati "Ubundi malaria iyo umubu ukuriye, tuzi ko uguteramo agakoko kakagenda kagakurira mu mubiri, kagatembera mu maraso, rero hari igihe malaria iba itarakura ngo itembere mu mubiri, icyo gihe iba itaraboneka mu maraso."

Yavuze ko nyuma y’amasaha nk’atanu ushobora kongera gupima ukabona malaria mu maraso kandi mbere wari wayibuze bitewe nuko agakoko kari kataragera mu mu maraso.

Abarwayi baragirwa inama yo kwihanganira igihe runaka gisabwa kugira ngo ibisubizo by’ibizamini byabo biboneke kuko gushyira igitutu ku baganga ngo babahe ibisubizo vuba bishobora kubatera imikorere mibi bigatuma badatanga serivise neza ku barwayi muri rusange.

Ushaka kumenya byinshi kuri serivisi zitangirwa muri Baho Internatonal Hospital wahamagara kuri +250 788 125 035.

Uteteyese Nadine asobanura ibibera muri laboratwari
Iyi mashini ipima ingano y'amaraso ikaba ari imwe mu ziboneka muri laboratwari ya Baho International Hospital
Iyi nayo ipima imisemburo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .