Urumogi rwangiza bikomeye intanga ngabo n’ubushobozi bwo kubyara- Ubushakashatsi

Yanditswe na Evariste Nsengimana
Kuya 31 Ukuboza 2018 saa 07:27
Yasuwe :
0 0

Inyigo yagaragaje ko abagabo bari mu kigero cyo kubyara bakoresha urumogi, bishobora kwangiza intanga zabo, bikanagira ingaruka ku bushobozi bwazo bwo gutanga umwana.

Ni inyigo yakozwe na Kaminuza ya Duke, yigisha iby’ubuzima muri Carolina y’Amajyaruguru, igamije kureba impinduka urumogi rwagira ku turemangingo tw’umubiri w’umuntu n’uw’imbeba mu gukora intanga.

Yashyizwe ahabona ku wa 17 Ukuboza uyu mwaka, igaragaza ko gukoresha uruvange rw’urumogi, bihindura imikorere y’intanga, cyane cyane iz’abazakomoka ku barukoresha.

Umwarimu wigisha iby’ubuzima bwo mu mutwe n’imyitwarire bya muntu muri Kaminuza ya Duke, akaba n’umwe mu bakoze inyigo, Dr. Scott Kollins, yavuze ko gukoresha urumogi bifite ingaruka nyinshi.

Yagize ati “Icyo twabonye ni uko ingaruka ku gukoresha urumogi ku bagabo n’ubuzima bw’imyororokere bwabo zitabura. Hari ingaruka bigira ku ruhererekane rw’ikorwa ry’intanga ngabo.’

Byagaragaye ko ubutabire buri mu rumogi, bugira ingaruka z’uruhererekane ku turemangingo tw’urukoresha. Izo mpinduka ngo ziba ku bantu bitewe n’imyaka, agace n’imibereho byabo, bikaba byanabatera indwara zirimo nka Kanseri.

Dr. Kollins ati “Ntituzi neza icyo bisobanuye ariko ukuri ni uko abahungu bato bageze mu kigero cyo kubyara bo mu bihugu byemerera gukoresha urumogi nka Amerika, ni ikintu dukwiriye gutekerezaho.”

Daily Nation yanditse ko igerageza ryakorewe ku mbeba n’abagabo 24 ryerekanye ko ubutabire buba mu rumogi, bwangiza by’uruhererekane uturemangingo tw’umubiri n’ibindi.

Umuyobozi w’agashami k’ubuzima bw’imyororokere muri Kaminuza ya Duke, wari uyoboye ubushakashatsi, Susan Murphy, yavuze ko urumogi rugira ingaruka mu ikorwa ry’uturemangingo mu ngano no mu mubare watwo.

Ati “Mu bijyanye nicyo bivuze ku kwirema k’umwana ntacyo turabimenyaho. Ntiwamenya niba intanga zangijwe n’ubutabire bwo mu rumogi zagira ubushobozi bwo gutanga umwana.”

Susan yavuze ko inyigo yanagaragaje ko ku bantu, gukoresha urumogi bifitanye isano nikorwa ry’intanga zidahagije, asaba abagabo barunywa bifuza kubyara ko babihagarika mu mezi atandatu mbere yo gushaka umwana, kugira ngo bitazagira ingaruka ku bazabakomokaho.

Ku Isi abantu barenga miliyoni 150 bakoresha urumogi kandi ko bakomeza kwiyongera uko ibihugu bigenda byemera ko rukoreshwa. Kuri ubu Leta 33 muri Amerika zashyizeho amategeko yemera kurukoresha nk’umuti.

Urumogi rugira ingaruka zirimo no kwangirika kw'intanga ngabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza