00:00:00 IGIHE NETWORK KN KINYARWANDA EN ENGLISH FR FRANCAIS

Uruhare rw’abagabo mu gusigasira ubuzima bw’umubyeyi n’umwana

Yanditswe na Ndikumwenayo Thierry
Kuya 15 Ugushyingo 2022 saa 11:49
Yasuwe :

Minisiteri y’ubuzima irasaba abagabo guhwiturana hagati yabo bagamije kugira uruhare mu kubungabunga ubuzima bw’umwana ndetse n’umubyeyi kuko bizafasha mu kugabana imfu z’ababyeyi bapfa babyara ndetse n’iz’abana bapfa bavuka.

Abagabo kandi baributswa ko uruhare rwabo ruzafasha mu gukumira igwingira ry’abana rikigaragara mu bice bitandukanye by’igihugu.

Kuri uyu wa 14 Ugushyingo, hatangijwe icyumweru cyahariwe kubungabunga ubuzima bw’umwana n’umubyeyi, cyatangirijwe mu murenge wa Cyanzarwe ho mu karere ka Rubavu, igikorwa cyahuriranye n’umunsi mpuzamahanga wo gukaraba intoki.

Mu nsanganyamatsiko igira iti “Nta mubyeyi ukwiriye gupfa abyara”, umuyobozi mukuru ushinzwe igenamigambi n’isuzuma bikorwa muri Minisiteri y’Ubuzima, Dr. Uwariraye Parfait yasabye abagabo kugira uruhare mu kubungabunga ubuzima bw’umubyeyi ndetse n’umwana.

Yagize ati “Uruhare rw’umugabo ni ingenzi kandi ni ngombwa, ni inshingazo ze kwita ku mugore utwite akamuherekeza mu gihe cyo kwipimisha; mu gihe cyo kubyara ndetse akanakomeza kumuba hafi na nyuma yo kubyara, mbese yumve ko gukurikirana ubuzima bw’umwana bimureba.”

Yakomeje asaba abagabo guhwiturana hagati yabo kugira ngo bafatanye muri iyi gahunda yo kwita ku buzima bw’umubyeyi n’umwana, hagabanywa imfu zabo bombi.

Umwe mu batuye umurenge wa Cyanzarwe yabwiye IGIHE ko abagabo bumva ko barebwa n’ubuzima bw’umwana ari bake, icyakora ngo iyi myumvire ihindutse hari icyo byahindura nk’uko babisobanuriwe.

Yagize ati “Ubundi abagabo benshi bumva ko akazi kabo ari ugushaka amafaranga; kumubwira gukurikirana umugore we utwite aba yumva nyine bireba uwo mugore, yewe n’umwana ni nyina uba agomba kumukurikirana. Dufatanyije nk’uko babitubwiye, ntabwo igwingira cyangwa abagore bapfa byakomeza kubaho.”

Umuyobozi wungirije w’akarere ka Rubavu ushinzwe imibereho myiza y’abaturage Ishimwe Pacifique, nawe yashimangiye ko bagiye kwegera abagabo babashishikariza gufatanya n’abagore mu rwego rwo guhangana n’ikibazo cy’imirire mibi iganisha ku igwingira.

Muri iki cyumweru kizasozwa kuwa 18 Ugushyingo, ababyeyi batwite barakangurirwa kwisuzumisha no kwegera abaganga hakiri kare mu gihe hari ikibazo bagize, nanone barashishikarizwa kurya indyo yuzuye.

Mu bindi bikorwa bizibandwaho harimo gutanga ikinini cya Vitamin A ku bana, ikinini cy’inzoka, gusuzuma imirire y’abana, gukingira imbasa ndetse no gutanga serivise zo kuboneza urubyaro.

Ubushakashatsi bw’ubuzima n’imibereho myiza y’abaturage bwo mu mwaka wa 2020 (DHS2020), bugaragaza ko ababyeyi 203 aribo bapfa babyara mu babyeyi 100,000 babyaye, ni mu gihe abana 19 aribo bapfa bavuka mu bana 1000 bavutse.

Imwe mu mpamvu y’izi mfu, ni ababyaza bakiri bake; niyo mpamvu Minisiteri y’Ubuzima ifite gahunda yo kongera ababyaza mu rwego rwo kugabanya izi mfu.

Abayobozi berekanye ko ari ngombwa gufata ikinini cy'inzoka no ku bantu bakuru
Dr. Uwariraye Parfait aha umwana ikinini cya vitamin
Icyumweru cy'ubukangurambaga cyahuriranye n'umunsi mpuzamahanga wo gukaraba intoki
Abana bato berekanye ko gukaraba intoki ari ngombwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .