UN Foundation yashimiye u Rwanda ku byakozwe mu kurwanya Ebola

Yanditswe na Mukwaya Olivier
Kuya 19 Gashyantare 2020 saa 02:54
Yasuwe :
0 0

Intumwa z’umuryango ufasha Loni gushakisha inkunga zitandukanye, UN Foundation zashimiye u Rwanda kubw’imbaraga rwakoresheje mu gukumira icyorezo cya Ebola bakaba banasabye ko n’ibindi bihugu byareberaho.

Ibi byagaragajwe kuri uyu wa Kabiri mu rugendo iri tsinda ry’abantu 13 rikorana n’Inteko Ishinga Amategeko y’Amerika bakoreye mu karere ka Rubavu mu gukora ubuvugizi ku mishinga yatewe inkunga n’uwo muryango mu bijyanye n’ubuzima.

Basuye ibikorwa byashyizweho na Leta y’u Rwanda mu gukumira icyorezo cya Ebola mu karere ka Rubavu.

Umuyobozi wungirije wa UN Foundation, Peter Yeo ari na we uyoboye iri tsinda yatangaje ko ibikorwa remezo byashyizweho mu rwego rwo kurwanya icyorezo cya Ebola byashimangiye icyizere u Rwanda rufitiwe n’imiryango itandukanye.

Ati“Ibi bigaragaza icyizere u Rwanda rugirirwa n’imishinga y’umuryango w’Abibumbye irimo UNICEF mu bikorwa byo gufatanya n’abaturage mu kurwanya ikwirakwizwa ry’icyorezo cya Ebola mu Rwanda. Buri wese akwiriye kubishimirwa kuba Ebola itarashoboye kugera mu Rwanda kandi hari urujya n’uruza rw’abantu benshi n’ahari Ebola.”

Yakomeje avuga ko yatunguwe n’ukuntu u Rwanda rwabashije gukumira icyorezo cya Ebola n’ukuntu imipaka ya Rubavu inyuramo abantu benshi bajya cyangwa bava muri Repubulika Iharanira Demokarasi ya Congo.

Ati “Natunguwe n’ubwinshi bwabambukiranya umupaka uburyo ari benshi kandi bihuta, nagenze mu bihugu byinshi ariko ibyo nabonye hano nta handi nabibonye, ikirenze ibyo ni uburyo u Rwanda rufatanyije n’imiryango mpuzamahanga bashoboye guhagarika Ebola ku mupaka nkuyu unyurwaho n’abantu benshi.”

Ebola yatangiye muri Repubulika Iharanira Demokarasi ya Congo muri Nyakanga 2018. Kugeza mu mpera z’umwaka ushize yari imaze guhitana abantu bibiri.

Ibyo byatumye Minisiteri y’Ubuzima mu Rwanda ifata ingamba zitandukanye zo gukumira icyo cyorezo. Hubatswe ibyumba abakekwaho icyo cyorezo bashyirwamo ku mipaka ya Rubavu na Rusizi ndetse hatangizwa n’ubukangurambaga bwo gukangurira abanyarwanda kwirinda icyo cyorezo.

Indi ngamba ni ugushyiraho aho gukarabira ku mupaka n’iy’ubukangurambaga bwiswe ‘Umurinzi’ bugamije gukingira abagera ku 200 000 biganjemo abakora ubucuruzi hagati y’u Rwanda na RDC.

Abacuruzi babanza gukaraba bavuye i Goma
Abana b'abakongomani baba mu mujyi wa Rubavu babanza gukaraba mbere yo kwinjira mu Rwanda
Ubwo bari bageze ku mupaka ugabanya u Rwanda na RDC
Basobanuriwe uko u Rwanda na Congo byakoranye mu guhangana na Ebola
Basuye ikigo cyagenewe kwakira abarwayi Ebola muri Rugerero
Ku mupaka muto bahasanze abana baje kwikingiza Ebola
PeterYeo, Umuyobozi wungirije wa UN foundation asobanurirwa uko u Rwanda rwakumiriye Ebola
Umupaka muto wa Petite barriere ukoreshwa cyane mu buhahirane
Umuyobozi w'ibitaro bya Gisenyi,Lt col Dr Kanyankore William yabwiye izi ntumwa ko nubwo nta murwayi wa Ebola wari waboneka igihugu cyiteguye
Zimwe mu ngamba zafashwe harimo gupima buri wese winjiye mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza