Umusanzu wihariye w’abajyanama b’ubuzima mu guhashya Malaria mu Rwanda

Yanditswe na Evariste Nsengimana
Kuya 1 Werurwe 2019 saa 11:08
Yasuwe :
0 0

Uko umubare w’abajyanama b’ubuzima ugenda wiyongera mu Rwanda, ni nako umusanzu batanga mu gusigasira ubuzima bw’abanyarwanda mu byiciro bitandukanye ugenda ugaragarira buri wese.

Abajyanama b’ubuzima ni urwego rwashyizweho na Minisiteri y’Ubuzima mu 1995, ngo rufashe igihugu gukemura ibibazo birimo abantu batabashaga kugera kuri serivisi z’ubuzima no kuba hari ubuke bw’abantu bashobora gutanga ubufasha mu by’ubuzima.

Gahunda y’abajyanama b’ubuzima yatangiranye n’abagera ku bihumbi 12 mu 1995, biza kugera aho buri mudugudu uhabwa batatu ariko uyu munsi bagera kuri bane ku buryo mu gihugu hose bagera kuri 58 286.

By’umwihariko kongera umubare n’ubushobozi bw’abajyanama b’ubuzima, byabaye igisobanuro gihagije mu guhangana na malaria kuko ubu bashobora kuyisuzuma, kuyivura iyo yoroheje no gutanga imiti yayo kuri 50% by’abayirwara mu gihugu.

Mu kiganiro yahaye IGIHE, Umuyobozi ushinzwe ishami ryo kurwanya Malaria mu kigo cy’ubuzima (RBC), Dr. Mbituyumuremyi Aimable, yavuze ko ‘Malariya ikomeje kuba ikibazo mu Rwanda kuko imibare y’abayirwaye itaragabanuka ku rugero rwifuzwa’.

Imibare y’abayirwaye ikunze kwiyongera cyane cyane mu bihe by’imvura kuko ari cyo gihe imibu ikwirakwiza malaria yororoka. Mu Rwanda ikunze kwiganza mu turere tw’Iburasirazuba n’Amajyepfo, bitewe n’imiterere yatwo irimo ubushyuhe n’amazi y’ibidendezi akunze kuhireka.

Dr. Mbituyumuremyi ati “Tubona ko hafi 70% by’abarwara malaria mu gihugu, dusanga bari mu Ntara y’Iburasirazuba n’Amajyepfo. Byerekana ko ari ho ikunda kuzahaza cyane nubwo n’utundi turere ihagaragara.”

Malaria yatangiye kwiyongera cyane hagati ya 2012 na 2017, aho yikubye hafi inshuro enye kubera impamvu zitandukanye zirimo imihindagurikire y’ikirere, kwiyongera kw’ibipimo by’ubushyuhe, kwiyongera kw’imvura n’imibu yagiye ihindura imiterere, bigatuma imiti yakoreshwaga itabasha guhangana na yo uko bikwiye.

Abarwaye malaria yoroheje bavuye kuri miliyoni imwe mu 2012 bagera kuri miliyoni 4,5 mu 2016 mu gihe abarwaye iy’igikatu bavuye 9,000 bagera ku bihumbi 17.

Hagati ya 2016 na 2017, abayirwaye muri rusange bagabanutseho ibihumbi 43o naho hagati ya 2017 na 2018 bagabanukaho ibihumbi 700.

Minisante igaragaza ko abarwaye malaria y’igikatu bavuye ku bihumbi 17 mu 2016 bakagera ku bihumbi birindwi mu 2018 naho abo yishe bavuye kuri 700 mu 2016 bagera kuri 300 mu 2018.

Dr. Mbituyumuremyi ati “Ibyo tukaba tubihuza n’ubundi n’uko kuvura bikozwe n’abajyanama b’ubuzima mu mudugudu kuko abaturage baba abana n’abakuru basa n’abivuza hakiri kare ugereranyije na mbere. Tubona ko hafi 50% by’abarwaye malaria bavurwa n’abajyanama b’ubuzima mu gihe mbere wasangaga ari nka 5-10%.”

Uretse ibyo hari n’ubukangurambaga mu miryango, gutera imiti yica imibu mu ngo z’Uturere malaria yiganzamo, gukwirakwiza inzitiramibu, cyane cyane ku bagore batwite n’abafite abana bari munsi y’umwaka.

Muri gahunda yo gutera mu nzu imiti yica imibu itera malaria, umwaka ushize yatewe mu turere dutanu, muri uyu mwaka uturere twa Kirehe, Nyagatare, Huye, Gisagara na Nyanza twamaze gutererwa naho Bugesera, Gatsibo, Ngoma na Rwamagana tugiye gukurikiraho.

Muri gahunda yo gutanga inzitiramubu ikorwa rimwe mu myaka ibiri, izirenga miliyoni eshanu ziheruka guhabwa abaturage muri rusange mu 2016-2017, iyi gahunda igiye gusubukurwa muri Nyakanga uyu mwaka ariko hari na gahunda ihoraho yo kuziha abagore batwiye n’abonsa.

Dr. Mbituyumuremyi avuga ko hari icyizere ko malaria izacibwa intege kubera uruhare rw’abajyanama b’ubuzima, urw’abaturage n’izindi gahunda zigenda zishyirwaho zo guhangana nayo.

Umujyanama w’ubuzima, umuganga wizewe

Umujyanama w’ubuzima witwa Mukabaranga Marcia, ukorera mu Karere ka Ngoma, Umurenge wa Mugesera, Akagari ka Ntaga, umudugudu wa Akinteko, yabwiye IGIHE ko bakangurira abaturage uko birinda malaria n’uko bayivuza mu gihe bagize ibyago byo kuyirwara.

Mukabaranga yavuze ko iyo umuturage abagezeho bamwakira, bakamubaza uko amerewe, bakamusuzuma basanga ari malaria yoroheje bakamuha imiti.

Gusa ngo kuri malaria y’igikatu irangwa no kuruka cyane, kubura amaraso n’ibindi, n’abagore batwite iyo bayirwaye, boherezwa ku kigo nderabuzima kugira ngo bitabweho n’abaganga babizobereyemo.

Ati “Dufite ibikoresho twahawe na Minisiteri y’Ubuzima ku buryo dusuzuma malaria byihuse, mu minota 20 akaba abonye igisubizo. Iyo dusanze ayirwaye, tumuhereza umuti wa Malaria, tukamubwira uko awufata.”

Yasobanuye ko banabashishikariza kugaruka mu gihe umuti bahawe bawufashe ariko bagakomeza kumererwa nabi, bakaba bamwohereza ku kigo nderabuzima, kimwe n’iyo bamusuzumye ntibamusangane malaria nabwo bamusaba kujyayo.

Mugenzi we witwa Sedongo Silas wo mu karere ka Kayonza, Umurenge wa Rukara, Umudugudu wa Karama, yavuze ko bafasha abantu bivuza malaria kuva kuwufite amezi atandatu kuzamura.

Uwo bayisanganye ngo ahita atangira gufata imiti imbere yabo, indi bakamubwirwa uko ayifata kandi bagakomeza gukurikirana niba yakize. Sedongo yavuze ko umuntu basanganye malaria bamuha ibinini bya Coartem.

Mu gihe umujyanama w’ubuzima imiti yamushiranye ashobora kuyisaba mugenzi we bakorera mu gace kamwe, kohereza umurwayi ku wundi mujyanama w’ubuzima cyangwa akifashisha ikoranabuhanga bifashisha bashaka gusaba indi muri Minisiteri y’Ubuzima.

Ubwo yaganiraga na IGIHE ku mugoroba wo ku wa 26 Gashyantare, Sedongo yagize ati “Nk’uyu munsi nakiriye abarwayi bane, umwe niwe nasanze atarwaye malaria. Ubwo nibura nko mu cyumweru nakira nk’abantu 15 barimo 10 bayirwaye.”

Ibyo bashingiraho bemeza ko umuntu arwaye malaria

Mukabaranga yavuze ko ibimenyetso by’ibanze umuturage yakwibonaho akihutira kujya ku mujyanama w’ubuzima cyangwa ku kigo Nderabuzika kimwegereye, harimo ‘guhinda umuriro mwinshi, gucika intege, kunanirwa kurya, umutwe n’ibindi’.

Muri gahunda zo kwirinda no gukumira malaria, abaturage basabwa gusiba ibidendezi by’amazi, kurara mu nzitiramubu ikoranye umuti, gukinga amadirishya hakiri kare, gutema ibihuru byegereye urugo n’ibindi.

Raporo ya 2018 y’Ishami ry’umuryango w’Abibumbye ryita ku buzima, OMS, igaragaza ko mu 2017 abantu basaga miliyoni 219 bo mu bihugu 59 barwaye malaria mu gihe umwaka wawubanjirije bari miliyoni 217. Igaragaza kandi ko mu 2017 iyo ndwara yishe abarenga ibihumbi 435 mu gihe mu 2016 barengaga ibihihumbi 451.

Abajyanama b’ubuzima bagira uruhare mu kuvura abanyarwanda, baba abana n'abakuru
Abarenga 50% by'abarwaye malaria bavurwa n'abajyanama b'ubuzima
Abajyanama b'ubuzima bo mu Karere ka Bugesera basuwe n'umuyobozi wa OMS yishimira uko bafashije u Rwanda mu guhangana n'indwara zitandukanye
Abajyanama b'ubuzima basobanurira Umuyobozi Mukuru w’Ishami ry’Umuryango w’Abibumbye ryita ku buzima(OMS), Dr. Tedros Adhanom Ghebreyesus akazi bakora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza